ISTEN Hailans Provinsal Helt Atoriti (EHPHA) i kamapim nau ripot bilong namba bilong COVID-19 long Isten Hailans provins.

Ripot i soim olsem namba i go antap nau long mak bilong 203. Bihainim dispela ripot, namba em i wok long i go antap yet.

EHPHA i mekim ripot tu bilong wanpela man helt woka husat i kisim dispela sik na i dai. Em i kisim dispela sik long ples wok bilong en long wanpela distrik helt senta long provins.

Sif Ekseketiv Opisa Dokta Joseph Apa na Dairekta bilong ol Pablik Helt Sevis Dokta Max Manape long wanpela toksave long lokal KBK redio program i tok, namba bilong COVID-19 em i wok long kamap hariap tru long Goroka distrik na ol arapela distrik tu olsem Kainantu, Lufa na Daulo.

“Nau yet planti ol helt wokmanmeri bilong mipela i wok long kisim dispela sik, olsem na long dispela as wanpela wokman bilong mipela i lusim laip bilong em. Na bihainim dispela hevi, em i soim olsem ol man, meri na pikinini i no wari long lukautim ol yet gut. Na moa dai bai i ken kamap sapos ol i no inap long bihainim dispela nu nomol  oda”, Dokta Manape i tok.

Dr. Apa i surukim toktok i go moa na i tok, mak bilong trensmisen em wok long suruk i go antap, olsem na ol lain long jeneral pablik husat i pilim olsem ol i wok long kus, skin hat, het pen na divelopim ol kainkain pen long bodi bilong ol i mas kamap na sekap hariap long long haus sik na helt senta.

“Lukluk long Isten Hailans nau long COVID-19, em i stap long level 3, na em i minim olsem mipela i stap long retpela mak,” Dokta Apa i tok.

Em i apil i go long ol man, meri na pikinini long jeneral pablik long putim pes mask olgeta taim. Bikpela samting em wan wan man, meri na pikinini i mas lukautim ol yet, long wanem, jeneral komyuniti trensmisen em i wok long kamap long bikpela skel.

“Long lukluk bilong mi, mi lukim olsem planti man na meri i no putim pes mask, na dispela em i putim yumi olgeta long bikpela sans bilong kisim COVID-19. Taim yumi kamap long wokim benking, wokim soping long ol supamaket na ol stoa, i go long kisim sevis long ol gavman institusen na ol bisnis haus na ol arapela pablik eria,” Dokta Apa i tok.

Sape Metta i raitim