OPISA i go pas long lukautim mog o ples bilong putim dai man long Pot Mosbi Jeneral Haus Sik, Albert Tole, i tok tupela nupela ais kontena i kam long WR Carpenter na Shipping Agency bai helpim ol bikpela tru.

Em i tok long las wik Fraide ol i gat 247 bodi bilong ol dai manmeri na pikinini insait long mog. Dispela namba em i bikpela tru long namba bilong spes ol i gat long holim ol bodi. Mog long PMGH inap long holim 90 bodi bilong ol dai manmeri na pikinini. Nau ol bai putim 30 insait long bilding, na 60 insait long tripela ais kontena i stap ausait we wan wan i ken holim 20 bodi.

“Long nau yet em mipela i dabolim ol bodi bilong ol dai manmeri na pikinini insait long wan wan spes long ol ais kontena bikos i nogat arapela hap moa long putim ol. Mipela i putim tupela na tripela bodi long wanpela spes tasol.

“Tasol tupela kontena i kam long WR Carpenter na Shipping Agency bai helpim mipela bikpela tru. Wanpela ais kontena inap long holim 20 na narapela em inap long holim 40 bodi. Bai mipela kisim kam insait na konektim long jenereta na skelim ol bodi i go i kam long dispela tupela nupela ais kontena,” Albert Tole i tok.

Sif Ekseketiv Opisa bilong PMGH Dokta Paki Molumi i tok tenkyu long WR Carpenters na Shipping Agency long gutpela helpim bilong ol we i kam long rait taim ol i nidim long en. WR Carpenters na Shipping Agency i givim 30 botol bilong pulim win tu. Dokta Molumi i tok ol dispela botol bilong pulim win i kam tu long rait taim we i helpim ol COVID-19 sikmanmeri kwiktaim tru.

“Ol sikmanmeri i save kam insait long haus sik sot win tru na mipela i bin sot long ol botol bilong pulim win long helpim ol. Taim ol WR Carpenters na Shipping i bringim ol dispela botol bilong pulim win i kam, mipela i stat yusim long dispela taim yet na nau mipela i yusim yet i stap, ”Dokta Molumi i tok.

Rebecca Negere i raitim