OL wokmanmeri long ples bilong karim pikinini long Pot Mosbi Jeneral Haus Sik i bin bisi na wok hat tru long helpim ol mama i karim 182 bebi long Ista Wiken.

Tim lida bilong dispela sif na midwaif Sista Dephney H. Hevelawa i tok, ples bilong karim pikinini i bin bisi tru long taim bilong Ista bikos i nogat inap wokmanmeri, sampela wokmanmeri i wok dabol sif tu long helpim ol mama.

“Mipela i bin bisi tru long dispela taim bilong Ista. Olgeta bet i pulap olsem na mipela i helpim ol mama long karim pikinini long floa. Taim ol medikol sumatin bilong mipela i stap ol i save helpim mipela tasol taim ol i no stap mipela i gat wanpela o tupela midwaif i save stap long wanpela sif,” Sista Hevelawa i tok.   

Em i givim ol stia tok long ol meri long kisim familI plening na ol mama i gat bel long kisim helpim hariap taim ol i gat pilim pen.

“Famili plening em i fri. Mipela i bai i gat planti mama i kam insait long ples bilong karim pikinini sapos yu no kisim famili plening na yu stap tasol long haus. Kain olsem wanem i wok long kamap long nau,” Sista Hevelawa i tok.

“Sapos yu save olsem yu go klostu long taim bilong yu long kisim bebi o taim yu stat long pilim pen kam hariap long haus sik na bai mipela helpim yu kwiktaim. Sampela mama husat i save wet longpela taim long haus yet i save karim pikinini long rot yet o insait long kar na putim ol yet na bebi bilong ol long mak nogut,” em i tok.

Em i tok lukaut long ol papa mama long putim ai long ol pikinini bilong ol na luksave long raun bilong ol bikos namba bilong ol liklik meri i bel i go antap tru. Ol yangpela meri krismas bilong ol i 14 na 15 tu i kam long ples bilong karim pikinini long karim pikinini.

“Planti bilong ol dispela yangpela meri i wok long kam long hia long karim pikinini. Na i gat planti nogut i stap insait long dispela kain hevi. Ol i ken kisim bagarap bilong karim bebi. Bel bilong ol i no strong tumas long holim hevi bilong bebi. Famili plening i no bilong marit manmeri tasol. Husat yu no marit tasol yu amamas long slip raun wantaim man o meri nating yu mas go kisim famili plening tu,” em i tok.