KATOLIK Edukesen ejensi long Madang provins i luksave tru long bikpela nid bilong redim human risos bilong provins na PNG na i kamap wantaim gutpela tingting long wokim wanpela nupela hai skul long Madang taun we bai i sanap long Yabong pilai graun.

Wanpela seremoni bilong kirapim dispela wok i bin kamap long Holi Spirit Praimeri skul i no long taim i go pinis we bai lukim wok konstraksen i stat long wokim kamap wanpela nupela bilding we bai i gat 6-pela klasrum i stap insait long en.

Planti ol papamama i amamas tru long gutpela luksave bilong Madang Asdaiosis aninit long Asbisop Anton Bal long sevim ol sumatin populesen bilong Madang distrik na kamapim dispela nupela hai skul.

Dispela seremoni long Holi Spirit praimeri skul i lukim ol pablik manmeri na tu biknem Madang bisnisman, Sir Peter Barter na Presiden bilong Divine Wod University (DWU), Pater Philip Gibbs i bin stap na lukim.

Bikpela astingting long kamapim dispela nupela hai skul em bikos long bikpela namba long ol gret 8 sumatin i pinisim skul long gret 8 na no inap go long gret 9 bikos no gat spes long ol hai skul long Madang.

Madang Katolik Edukesen Ejensi skul Seketeri, Bruno Tulameni i tokaut olsem Madang distrik i gat bikpela hevi nau i stap we i save lukim olsem long olgeta yia bikpela namba long ol Gret 8 sumatin i save go aut olsem drop aut bikos ol i no inap go het na mekim gret 9.

MistaTulameni i tokaut olsem long Madang provins i gat 3000 spes tasol i stap long ol sekenderi na hai skul long kisim ol Gret 9 sumatin long olgeta yia, na ol arapela 6000 sumatin husat i wokim gret 8 i no gat spes long go het long mekim gret 9.

Em i mekim bikpela askim i go long olgeta stekholda olsem ol i mas wok bung wantaim na lukim kamap bilong dispela nupela Katolik hai skul long Madang taun na wokbung long lukim em i gro na sevim ol sumatin bilong Madang distrik.

MistaTulameni i tok ol i laik kisim ol gret 11 na 12 long bihain tasol bikpela samting em spes long holim namba bilong ol sumatin.

Benny Bogg, husat em siaman bilong bod long Holi Spirit praimeri skul i amamas long lukim seremoni i kamap long makim kirap bilong nupela skul, tasol em i askim olgeta papamama bilong ol sumatin long wokbung wantaim na karim wok.

Mista Bogg i tok planti yia i go pinis em ol papamama i no save sanap na holim han wantaim na mekim wok long gutpela bilong skul.

Em i tok dispela tok ‘bung wantaim’ em ‘hot air’ o toktok nating tasol.

James G. Kila i raitim