Ripot i kam long opis bilong Nesenel Kontrol (NCC) Senta bilong COVID-19 i tokaut olsem Papua Niugini nau i gat moa long 65 pipel i dai long COVID-19 na moa long 7400 pipel i kisim pinis sik COVID-19.

Tasol i nogat ripot bilong husat manmeri na pikinini long dispela namba 7406 i orait pinis o i karim COVID-19 sik long bodi yet.

Kontrola David Manning i tok NCC i luksave olsem i gat bikpela laik long pablik long save long namba bilong ol ektiv keis bilong COVID-19 na tu namba bilong ol manmeri na pikinini husat i gat COVID-19 na i orait pinis.

Tasol em i tok NCC i no givim ripot long ol dispela namba bikos no gat rekot long NCC. Em i wokmak bilong ol provinsal helt atoriti long lukluk long ol COVID-19 siklain na givim ripot, em i tok. Tasol i nogat wanpela ripot long dispela said i kam kamap long NCC yet.

Ol ripot i kam i soim 52 pipel long NCD i dai long COVID-19, Morobe i gat 3-pela na Wes Sepik tu i gat tripela dai bilong COVID-19. Tupela dai i kamap long COVID-19 long Wes Nu Briten, na tupela long Westen Hailens na tupela dai long Westen provins tu. Enga, Jiwaka na Nu Ailan i gat rekot bilong wan wan dai long COVID-19 long wan wan bilong ol dispela provins. Ol dispela dai i apim namba bilong COVID-19 dai i go long 67. 

Long dispela taim, Noten Provins i ripotim tripela namba wan keis bilong COVID-19 long provins. Tupela man na wanpela meri. Krismas bilong ol i stap namel long 37 na 60 na tupela i no bin soim sain bilong COVID-19 long taim bilong test na wanpela tasol i bin soim sain bilong COVID-19 long taim bilong tes.

Westen Provins i ripotim nupela 108 keis bilong COVID-19, Morobe Provins i ripotim 68 nupela COVID-19 keis, NCD ripotim 61 nupela keis, Is Nu Briten ripotim 47 nupela keis,  Westen Hailans ripotim 42 nupela keis, Wes Sepik ripotim 24, Isten Hailans ripotim 5 na Enga ripotim 5. Sentral i ripotim 2 na Hela tu i ripotim 2 nupela keis bilong COVID-19 na Nu Ailan i ripotim wanpela nupela keis bilong COVID-19.

Dispela i nau bringim namba bilong COVID-19 keis long kantri i go 7406 na 67 dai.

Rebecca Negere i raitim