WANPELA stetmen i kam long Developmen Seketeri bilong Catholic Bishop Conference bilong Papua Niugini na Solomon Ailan, Mondu Marie, i tok ol lain husat i go pas long menesim pandemik long kantri i mas no ken lustingting long ol hevi i kamap bihainim ol  disisen ol i mekim na tu no ken lustingting long ol wok bilong ol praimeri o besik sevis bilong kantri.

Dispela stetmen i kam long taim we kantri i bungim namba tu taim nogut bilong COVID-19 we Kontrola David Manning i givim ol nupela lo bilong bihainim na tu Praim Minista James Marapela i wetim yet ol provinsal helt atoriti long givim akaun long ol mani bilong COVID-19 ol i yusim long daunim COVID-19 long Provins bilong ol.

“Mipela i bin lukim bikpela abyus bilong pawa na ol rait bilong ol sitisen long kantri long namba wan taim pandemik i stat o taim nogut. Na dispela taim nogut i go het yet long bagarapim ikonomi na helt na gutpela sindaun bilong sitisen na ol lain ovasis husat i kam stap long PNG.

“Planti tausen famili i no gat inap mani long lukautim ol yet na planti moa yet i bungim hevi bilong kaikai i sot. Ol turisim indastri na ekstreksen indastri i rausim ol wokmanmeri long wok.

“Nogat sekyuriti o narapela helpim bilong ol famili husat i mas stopim ol liklik bisnis bilong olbikos long COVID-19. Na i nogat luksave long ol wokmanmeri insait long ol ekstrektiv indastri na kopret kampani husat i mekim bikpela wok long dispela taim nogut na i kisim liklik pe tasol,” Stetmen i tokaut olsem.

Long dispela as ol arapela kantri na ol ogenaisesen i helpim kantri wantaim mani  long daunim dispela taim nogut na tu long apim mak bilong ol helt sevis long kantri. PNG i tu i bin painim sampela mani tu bilong dispela as.

 “Tasol ol dispela i no kamap na mipela i lukim olsem mak bilong ol helt sevis bilong mipela i go daun bikos long tingim ol yet o bikos ol i nogat gutpela tingting,” Mis Mondu i tok.

“Yumi mas dairektim ol fainensal risos o mani yumi gat i go long helpim pablik helt nid bilong yumi na balensim tritmen na kea na daunim ol arapela laipstail na helt kea hevi we i namba wan long strong bilong bodi bilong yumi,” em i tok.

Ol i singaut long Nesenel Dipatmen bilong Helt na opis bilong Kontrola long wokbung wantaim ol ki sevis provaida, ol bisnis haus na ol humen rait muvmen na no ken kisim sans long dispela hevi.

Rebecca Negere i raitim