Ol 40 helt woklain long Nonga haus sik i kisim sik COVID-19 na haus sik i pilim bikpela hevi long ranim wok bilong ol long lukautim ol sik manmeri na pikinini.

Bosman bilong lukautim sik COVID-19 long Is Nu Briten Dokta Alex Maha i tokaut long NBC Tok Bek program long dispela wik Mande.

Dokta Maha i tok 40 woklain bilong Nonga haus sik na 26 woklain bilong St.Mary Haus sik long Vunapope i kisim COVID-19.

Dokta Maha i tokaut olsem Nonga haus sik i gat hevi na ol i pasim sampela seksen bilong hausik olsem operesen haus o hap bilong katim ol sikmanmeri. Na tu sampela wod i nogat inap woklain long mekim wok.

“Mipela i pilim hevi nau long karimaut wok bilong mipela bikos planti woklain i kisim sik, na mipela tingting long kisim ol woklain long arapela hap long kam helpim mipela,” Dokta Maha i tok.

Em i tok long Mande dispela wik, 314 manmeri i kisim tes long Is Nu Briten we risal bilong sampela i soim ol i nogat COVID-19.

Dokta Maha i tok, St.Mary Haus sik long Vunapope long Kokopo bai pasim sampela seksen long helpim ol sikmanmeri bikos long 26 helt woklain i kisim COVID-19. Em i tok ol helt woklain long Vunapope haus sik bai holim wanpela miting long dispela wik long skelim sapos ol i ken statim wok gen o nogat.

Dokta Maha i tok long 314 husat i kisim COVID-19 test, wanpela em lapun meri krismas bilong em 82 na em i dai pinis, 105 em risal bilong ol i soim olsem ol i nogat COVID-19 na 109 tes risal bilong ol i no kam aut yet.

Em i tok tu olsem ol i gat bikpela hevi long wanem ol i sot long ol samting long karimaut tes long ol sik manmeri i gat sain bilong COVID-19.

Dokta Maha i singaut i go long pipel bilong Is Nu Briten na kantri wantaim long no ken pret na lukautim ol yet long abrusim sik. Em i tok moa olsem nogat lokdaun long Is Nu Briten, bihainim nupela pasin long werim pes mask, wasim han, kisim spes olsem 1.5 mita long pablik ples long helpim yu long no ken kisim COVID-19.

 No ken bagarapim arapela manmeri i gat COVID-19, helpim em bai helpim arapela manmeri long daunim COVID-19 long Is Nu Briten na kantri wantaim.

Michael Novingu i raitim