ORORO Praimeri Skul long NCD i stat bihainim wan wan skedul bilong ol bihain long COVID-19 i bin pasim olgeta skul insait long Pot Mosbi.

Dispela em bikpela salens bilong olgeta tisa na sumatin wantaim stat long Lowa praimeri i go antap long Apa praimeri sumatin.

Wanpela sinia tisa bilong skul Mista Sailas Max i bin tokim Wantok Niuspela olsem dispela em nomol bilong olgeta skul insait long NCD olsem na ol harim tok bilong gavman na bihainim olgeta COVID-19 Protokols.

“Mipela statim wantaim ol Gret 7 na Gret 8 long kam kisim ol asainmen pepa long wokim long haus na kam givim bek long skul wantaim strongpela COVID-19 protokol ,” Mista Max i tok.

“Mipela i setim taim bilong ol sumatin long kam givim asainmen o hom wok na kisim nupela gen go long haus olgeta wik,” em i tok.

Planti sumatin i laikim dispela rot bilong kisim save tasol sampela i no wanbel long dispela bikos no gat sapot bilong tisa wankain long klasrum.

Em i tok planti bilong ol sumatin i save kisim moa save na klia gut taim ol stap wantaim tisa long klasrum na taim COVID-19 pasim olgeta skul i bin mekim olgeta sumatin go kam long wan wan taim bilong ol lukim tisa na askim long wanem samting ol i no klia tumas long en.

Dispela skul i gat planti gutpela sumatin wantaim gutpela pasin na i save laikim edukesen olsem na olgeta tisa i bin plenim skedul bilong olgeta long kamap na lukim ol tisa.

Jacklyn Kimala i raitim