OLGETA Haia Edukesen Institusen (HEIs) i mas go het wantaim tising akedemik ektiviti bilong ol bihainim wan wan skul akedemik kalenda bilong ol long dispela yia.

Dispela disisen i bin kamap bihain long konsaltesen wantaim ol Stet ov Emejensi (SoE) Kontrola David Manning na ol Dipatmen bilong Haia Edukesen Riset Sains na Teknoloji (DHERST) long tokim olgeta Haia Edukesen Intitusen i mas go het wantaim 2021 Akedemik kalenda.

Ol i laik tok klia olsem dispela instraksen i bin kam aut long SoE Kontrola long pasim olgeta skul dispela akedemik yia, em bilong ol Praimeri na Sekenderi Skul, i no bilong Haia Edukesen Insitusen.

Olgeta Haia Edukesen Institusen (HEIs) i mas  bihainim dipela ol instraksen na go het wantaim 2021 Akedemik Yia.

No gat wanpela i ken ranawe long COVID-19 tasol yumi yet. Mipela i mas mekim wanem samting em rait long protekim mipela yet na ol stap wantaim mipela. Larim mipela stat nau long kisim ol gutpela samting long stopim dispela suruk bilong COVID-19 sik.

“Long makim maus bilong Minista bilong Haia Edukesen Risets, Sains na Teknoloji Wesley Raminai, mi laik kisim dispela sans long tok tenkyu long olgeta HEI Sansela, Vais Sansela, Presiden, Dairekta, Prinsipal, Akedemik na Non-akedemik pren long go het long sapotim dispela COVID-19 salens. Mi amamas long ol sumatin tu long go het sapot na koperesen bilong ol long dispela taim no gut,” Sekreteri bilong DHERST Pater Jan Czuba i tok.

Mipela i pre long God, long dispela taim bilong hevi. Mipela pre long givim wisdom bilong em na bel isi. Mipela pre long ol husat i sik i mas orait. Mipela i pre long ol helt ke wokmanmeri, bai ol gat strong long lukautim ol sik manmeri. Mipela i pre long wisdom bilong ol lida long taim ol wokim strongpela disisen long lukautim mipela olgeta. Mipela i askim God long yusim dispela taim long bungim mipela olgeta na laikim ol arapela.

Tenkyu na mi tok gudlak long yupela olgeta long go het wantaim 2021 akedemik wok bilong yupela.