WANPELA Sinia Flierl Seminari long Logaweng Finsafen i bin kisim nupela prinsipal bilong ol long las wik.

Dispela skul i wanpela bilong ol tripela seminari bilong ELCPNG we i save trenim ol yangpela long kamap pasto. Na tu long kamap tru tru wokman bilong God long go wan wan na serim Gutnius.

Logaweng Seminari skul bilong lainim ol yangpela long Tok bilong God na long kain kain sabjek olsem Luteren Histori, Sios Doktrin, Katekism bilong Dokta Martin Luther, Sande skul na Relises linstraksen Program na sanap long Ministri bilong Kristen.

Ol Yangpela Kristen save kam kisim skul long kamap pasto, em inap 5-pela Yia olgeta. Tripela yia skul, 1-pela yia go prektikol na kam bek long seminari em namba 5 yia na greduet olsem yu pinisim mak olsem nau yu ken kamap pasto.

Program bilong Instolesen, hendova tekova i bin kamap long mun Disemba. Long dispela taim ol trainee pasto na ol Komuniti na ol ples klostu olsem Sokaneng, Gawenglabu ol i kamap long witnesim dispela wok.

Foma prinsipal em Rev. Beka Kosieng husat i bilong Quembung Seket insait long ELC Kotte Distrik, na nupela prinsipal em Rev. Joseph Benson bilong Marele Paris, ELC Siassi Distrik.

Nupela prinsipal em i longpela taim em bin stap prinsipal long Banz Luteren Koles. Sios makim em kamap olsem prinsipal bilong Logaweng Seminari, we Sios Kaunsil bin Luksave long em long 2020.

Pasto Phillip Peandi wanpela sumatin nau stadi long Bachelor Digri bilong em long Martin Luther Seminari em i go long witnesim dispela wok bin kamap long Logaweng.

Em i stori olsem program i lukim ol sios lida bilong ELCPNG olsem Het bilong Dipatmen, Rev. Hans Giegere, Ekting Wokman Trening Dairekta, Pasto Wesley Kerenga na ELC-Kotte Distrik Ekting Presiden na Gutnius Dairekta Pasto Elenas Waraga ol i bin kamap stap wantaim long dispela taim.

Pasto Peandi Phillip i tok Logaweng Seminari i gat 10-pela tisa, we nau ol lainim ol yangpela long kamap pasto. Em i tok olsem insait long sios olgeta mipela i amamas long lukim senis kamap we i bihanim tem. Taim bilong arapela long pinis na narapela kisim ples.

Het bilong Wokman Trening Dipatmen bilong ELCPNG we ol seminari i stap aninit long en, Rev. Hans Giegere i tok Rev. Beka Kosieng em bihanim taim na wok em mekim kam inap long mak na sios givim bikpela tenkyu long taim em i sevim long seminari olsem prinsipal. Papa God em i save lukluk long man givim taim na komitmen bai wok bilong em karim kaikai. Mi makim sios na kamap hia mi tok tenkyu tu long nupela prinsipal tu, yu bin sevim long Banz Luteren Koles, na yu ken lukautim ran bilong seminari wankain olsem Banz. God bai blesim yu long edministresen wok bilong yu na ol wokmanmeri bilong Logaweng.

Paulus Tali i raitim