GAVMAN i pasim olgeta skul long las wik Fraide bihain long namba bilong COVID-19 long kantri i sut i go antap tru insait long dispela mun tasol.

Nesenel Pandemik Kontrola David Manning i tok ol i toktok pinis wantaim sekreteri bilong edukesen Dokta Uke Kombra na ol i pasim ol skul.

Em i min olsem ol skul i statim skul holide bilong ol tupela wik bipo long taim ol i makim long skul kalenda. Ol bai i holide foapela wik olgeta.

 Dispela i bihainim streteji bilong COVID-19 Nesenel Pandemik long aisolesen we bai i kisim foapela wik olgeta na bihain long dispela bai kisim tripela moa wik.

Manning i tok namba bilong COVID-19 i sut i go antap long ol arapela provins tu olsem na dispela mesa i mas kamap.

Em i tok ol trensimesen i wok long kamap long ol komyuniti insait long ol wik i go pinis na nau ol i wok long kamap ples klia insait long ol rurel ples.

Insait long dispela foapela wik Nesenel Pandemik Kontrol Senta bai i lukluk long wanem rot ol inap menesim dispela kirap bilong COVID-19. Long mekim dispela i kamap ol bai i putim sampela hatpela kontrol.

Pastaim ol bai i pasim ol provins long wanpela na narapela na ol Provinsal Helt Atoriti bai i sanap fultaim nau na karim aut ol wok long ol provins.

Ran bilong ol balus tu long ol provins bai i senis stat long dispela wik.