DIVINE WORD UNIVERSITY i bin holim namba 39 Greduesen bilong ol bihain long ol i bin rispektim dai bilong Gren Sif Sir Michael Somare.

Ol 700 sumatin i greduet long dispela taim.

Dispela greduesen seremoni i save kamap olgeta yia wantaim Bachelor Digri tasol long dispela yia, namba bilong COVID-19 i go antap tru olsem na ol senisim sindaun stail bilong ol bihainim ol COVID-19 Protokol.

Olgeta famili na papamama bilong ol sumatin i no bin go stap insait wantaim ol sumatin long dometri hap bikos long ol COVID-19 protokol. Tasol ol i bin givim ples bilong ol long stap na yusim em long MC Dipatmen na yusim ol toilet long SVDMA inap greduesen de i bin pinis.

Ol sumatin i bin amamas long kisim Bachelor Digri bilong ol long wan wan Dipatmen bilong ol na mekim ol papamama na famili i amamas long dispela pepa.

Dispela em bikpela samting long laip bilong ol wan wan sumatin taim ol i bin kisim Digri pepa bilong ol na tu em bikpela de bilong ol we i kamap wanpela taim long laip.

Maski COVID-19 i bin bagarapim stadi bilong ol tasol olgeta sumatin i bin menesim stadi bilong ol inap olgeta i bin kisim kaikai bilong en.

Dispela greduesen de i bin kamap orait maski COVID-19 tasol olgeta i bin givim moa taim long plening bilong ol DWU greduets.

Bihainim pasin bilong ol dispel greduesen seremoni i stat wantaim Misa na bihain ol i givim ol setifiket long ol sumatin.

Jacklyn Kimala i raitim