EIT-TAUSEN COVID-19 veksin long Australia i kam kamap long Jackson Ples Balus, Pot Mosbi long Tunde avinun.

Dispela em wanpela bilong ol helpim we Australia i wok long givim long helpim Papua Niugini long stopim COVID-19 long i go i kam long kantri.

Praim Minista James Marape, Hai Komisina bilong Australia long PNG Jon Philp, Helt na HIV AIDS Minista Jelta Wong, Egrikalsa na Laipstok Minista John Simon, Kontrola bilong PNG COVID-19 Pandemik na Polis Komisina David Manning na Seketeri bilong Helt Dokta Osbourne Liko i wet long Jackson Ples Balus taim ol dispela 8,000 veksin i kam kamap.

Praim Minista Marape i tok, Australia i tok promis long sapotim PNG wantaim narapela wan milien veksin gen. World Health Organization (WHO) na ol patna bilong en i kisim pinis klostu 700, 000 veksin bilong PNG we bai kam long PNG bihain long tupela o tripela mun.

“Ol dispela veksin i kam em i no bilong olgeta manmeri na pikinini long kantri long kisim. Tasol ol dispela veksin i stap, sapos yu pilim olsem yu gat bikpela nid long banisim yu yet long COVID-19 orait yu ken i go na kisim. Namba wan lain we mipela i bai lukluk long ol pas em ol helt woka na bihain yumi ken lukluk long yumi ol arapela insait long kantri,” Praim Minista Marape i tok.

Praim Minista James Marape i tok em i amamas long kamap namba wan man long kisim dispela veksin long soim olsem dispela veksin em i gutpela long ol lain husat i laik kisim.