WANPELA man husat i kamap long Maunt Hagen Haus Sik long kisim helpim i dai long geit bihain long ol sekyuriti i tok nogat long em i go insait long haus sik.

Em i bin wet ausait long geit tupela aua olgeta na em i dai long dispela hap tasol.

Dispela man i bin pundaun long ples bilong em long moning long las wik Fraide 19 Mas 2021 na sampela famili lain bilong em i kisim em i go long Maunt Hagen haus sik.

Tasol ol sekyuriti i bin pasim geit na tok nogat long ol sikmanmeri i go insait. I bin i gat planti arapela sikmanmeri tu i sindaun arere long banis klostu long geit na wet long kisim helpim long dispela haus sik.

Ol pipel i askim olsem wanem na dispela bikpela haus sik i pas.

“Inap ol edministresen bilong haus sik i tok klia stret long ol pipel bilong wanem tru na ol i pasim geit long ol sikmanmeri,” Michael Rui sitisen bilong Maunt Hagen i askim.

“Na wanem arapela hap bai ol pipel i kisim helpim, em ol i mast okaut, Rui i tok. 

Wantok Niuspepa i no bin inap long kisim stori bilong Maunt Hagen Haus Sik edministresen.