PAPUA Niugini nau i gat 3, 758 keis bilong COVID-19 na namba bilong dai i go antap 37. Ol nupela keis i kam long 4-pela provins. Nesenel Kepital Distrik, Westen Provins, Is Nu Briten Provins na Nu Ailan provins.

Antap long ol dispela nupela keis i gat foapela keis we PNG i karim i go long ovasis. Tupela bilong ol dispela 4-pela keis i kwarentin long wanpela hotel long Sydney, Australia. Tupela i bin raun long Wewak na Pot Mosbi bipo long tupela i go kamap long hap. Namba 3 keis em ol i painim em long kwarentin long wanpela hotel long Cairns, Australia. Em i stap long Westen Provins na i raun i go long Australia long en ol i luksave long en. Na namba 4 keis em ol i painim em insait long kwarentin long wanpela hotel long Nu Silan.

Westen Provins i ripotim ol COVID-19 keis long las yia yet na i stap namba tu provins wantaim bikpela namba bilong COVID-19 keis baksait long NCD long kantri. I no long taim i go pinis Westen Provins i ripotim wanpela dai i kamap long COVID-19.

Kontrola bilong Nesenel Pandemik Rispon na Polis Komisina David Manning i salim sori bilong en i go long ol famili bilong dispela keis husat i dai long Westen Provins.

“Em i no isi samting long givim ripot bilong dai. Mipela i strongim olgeta long lukautim yupela yet na strongim pasin bilong bihainim ol lo bilong helt insait long “Nupela Pasin” Dispela ol toksave em i no bilong ol lain husat i stap long ol taun na ol eben ples tasol, em i bilong ol lain husat i stap long ples na bus tu.

“Dispela vaires i save kalap long wanpela man i go long narapela man na long kain kantri olsem PNG, planti manmeri na pikinini i no laik long go kisim tes. Ol i wet inap ol i sik nogut tru, tasol long dispela taim em ol i givim sik i go long narapela pinis.

“Olsem na mipela i no inap long save gut wanem mak dispela vaires i winim pinis long kantri,” Kontrola Manning i tok.

“Yumi save stap insait long komyuniti long PNG. Mipela i gat planti lain i stap insait long wanpela haus. Holim pas na sekan em pasin bilong mipela. Tasol nau yumi mas senisim ol dispela pasin long helpim yumi yet long abrusim sik COVID-19 na ol arapela sik olsem sik Tubekulosis. Kain olsem, tromoi han na muvim het tasol taim yu laik tok helo long narapela,” Kontrola Manning i tok.