KONTROLA bilong Papua Niugini COVID-19 Nesenel Pandemik Rispon na Polis Komisina David Manning i tokaut long las wik Sarere, Mas 20, olsem Memba bilong Kerema Open Richard Mendani i dai long sik COVID-19.

“Sori stret olsem dai bilong en i kamap long wanpela yia bihain long de we kantri PNG i bin luksave long COVID-19 sik long kantri,” Kontrola Manning i tok.

Em i tok Mista Mendani i bin go long Imejensi Dipatmen bilong Pacific Intenesenel Haus Sik (PIH) long Februeri 24 bikos em i pilim skin hat, kus, sotwin, na hetpen long Februeri 19. Long stat, ol helt wokmanmeri long Hope Clinic i bin ting nimonia na ol i bin helpim em long dispela tasol sik bilong en i no pinis. Ol i salim em i go long PIH long ol i bai sekim em gen na menesim dispela sik.

“Ol helt woka i saspek olsem em i mas i gat COVID-19 olsem na ol i bin mekim PCR tes long en na risal i tokaut olsem em i tru. Dispela toktok olsem dai i ken kamap long COVID-19 em i tru, sori tru olsem gutpela Memba bilong mipela i baim dispela toktok na i lusim laip bilong en bikos long dispela sik nogut,” Kontrola Manning i tok.

Em i tok moa olsem, “COVID-19 em i wanpela kain samting we bai yu no i nap long lukim tasol em samting bilong kilim man na em i save raun long win yumi pulim na ol samting yumi tatsim. Tasol yumi ol manmeri na pikinini, ol woklain, ol papa mama bilong ol liklik ol bisnis na ol wokmanmeri blong gavman i ken mekim wokmak bilong yumi long lukautim ol lain yumi laikim na mekim ol i stap seif.”

Kontrola Manning i tok taim COVID-19 i kam long PNG long namba wan taim Gavman bilong PNG i wok long givim skul long ol pipel.

Em i tok, “Yumi stap gut tru long namba wan raun bilong COVID-19. Mipela i winim planti ol arapela kantri na i kam gut bikos PNG em ol lain bilong kea long narapela na tu bikos mipela i laik mekim komyuniti bilong mipela i stap seif. Tasol dispela namba 2 raun bilong COVID-19 em i bikpela na i strongpela moa long pastaim wan olsem na mipela i mas banisim mipela yet.

“Ol namba bilong COVID-19 keis i nau abrusim 3,000. Dispela em i tripela taim moa long namba bilong ol posistiv keis long wanpela mun i go pinis. Mipela i mas redi long dispela namba i bai go antap.

“Birua bilong yumi em vaires bilong COVID-19 na em i stap long han bilong yumi long paitim dispela birua, taim yumi redi na opim ai na stopim dispela vaires long i go i kam,” Kontrola Manning i tok.