BIKPELA salens long kantri nau em long helpim ol manmeri na pikinin long kantri long luksave olsem mak nogut na taim nogut bilong COVID-19 i no pinis yet, Dokta Osborne Liko Seketeri bilong Nesenel Developmen bilong Helt (NDOH) i tok.

“Taim vaires bilong COVID-19 i raun yet long komyuniti na kantri, olgeta manmeri na pikinini i stap long mak nogut long kisim COVID-19. Bikpela salens nau em long helpim ol pipel bilong Papua Niugini long save olsem mak nogut na taim nogut i no pinis yet,” Dokta Liko i tok.

Dokta Liko i tok moa olsem maski veksin bai kam long kantri ol pipel i mas i go het long strongim ol lo bilong nupela pasin we i save wok, kain olsem; werim pes mask long pablik ples, stap longwe long wanpela na narapela, wasim han klostu klostu, kus i go insait long hanskru o taim yu kus i go insait long tisu, tromoi i go insait long rabis bin, i no ken i go long ples we planti manmeri i bung long en na kisim gutpela win olgeta taim.

 NDOH i givim strongpela tok lukaut tu olsem COVID-19 bai stap yet long kantri nau na bihain tu na ol manmeri bilong mekim disisen na ol manmeri na pikinini long kantri i mas opim ai na kisim was na stap. Na tu ol i mas bihainim gut ol lo bilong nupela pasin long lukautim ol yet na ol arapela.

Rebecca Negere i raitim