MAUSMAN bilong World Health Organization (WHO) long PNG Dokta Luo Dapeng i tok Papua Niugini i bin i gat namba wan streteji o wei bilong rispon long COVID-19.

Dokta Dapeng i mekim dispela tok long gutbai toktok bilong en long Nesenel Kontrol Senta i no longtaim i go pinis.

“Mipela i bin i gat namba wan streteji tasol insait long ol wik i kam olsem, situesen i bin senis na i lukim namba bilong ol COVID-19 keis i go antap long wan wan de. Mipela i mas putim gen ol lo mipela i wok long bihainim long pastaim,” Dokta Dapeng i tok.

Em i strongim ol rispon tim long sanap strong na i go het long toktok na wokbung wantaim ol lida long wanem ol i ken mekim long daunim COVID-19.

Dokta Dapeng i bin kam long PNG long June 2007 long wok wantaim wanpela program bilong malaria. Na insait long ol yia i kam antap olsem em i bin wok wantaim na givim sapot long ol arapela program bilong abrusim na daunim ol sik, kain olsem kempen bilong misel na polio we i bin kamap long tupela krismas i go pinis.

Maski planti nogut toktok i kamap namel long ol pipel, Dokta Dapeng i tok ol dispela kempen i gutpela na em i gat strongpela tingitng olsem gutpela samting tu bai kamap long ol rispon bilong COVID-19 we i wok long kamap i stap.

“Mipela i mas lainim long wanem mipela i bin mekim na i no ken pret,” em i tok.

Aninit long lidasip bilong Dokta Dapeng, WHO i bin mekim planti wok long sapotim rispon bilong COVID-19.