LONG Fraide Mas 5, 2021 Bundi Distrik long Madang Provins i amamas tru long kisim wanpela ambulens.

Dispela em i namba wan taim tru long histori bilong dispela districk long kisim wanpela ambulens.

Moa long 4,000 pipel long Bundi na Jimi long Simbu Provins i kam bung long Snow Pass na amamas long dispela sevis. Fiftin singsing grup wantaim kainkain bilas na danis na 5-pela string ben i kamap long dispela de long amamas na luksave long dispela helt sevis i kam long distrik bilong ol.

Sir Brian Bell Foundation i givim dispela ambulens we i gat olgeta samting insait long en bilong helpim ol sik manmeri na pikinini. Dispela kain sevis i kamap insait long gutpela wokbung bilong Kumura Faundesen, wanpela komyuniti bes ogenaisesen long Bundi wantaim Sir Brian Bell Foundation.

Long dispela taim Ian Clough, siaman bilong Brian Bell Foundation na tu em bubu man bilong Sir Brian Bell, Robert Nilkare, siaman bilong Simbu Provinsel Helt Atoriti (SiPHA), Dokta Francis Wandi, Sif Ekseketiv Opisa bilong SiPHA na ol arapela i bin stap na go pas long ol seremoni.

Ol pipel i amamas tu taim ol i opim tu ol 10-pela komyuniti helt senta na wokim dedikesen seremoni tu bilong 10-pela sumatin husat bai I kisim Komyuniti Helt Woka (CHW) trening long dispela yia.

Dispela 10-pela sumatin i makim 10-pela ples long apa na lowa Bundi. Ol bai i go skul long Kundiawa CHW Trening Institusen long Simbu Provins na long Tombil Seventh-Day Adventist CHW Trening Institusen long Jiwaka.

Taim ol i pinis ol bai i go bek na beis long ol helt senta long ples bilong ol na givim sevis long pipel bilong ol.

Sir Brian Bell Foundation i sapotim dispela olgeta wok kamap bilong 10-pela helt senta na skul bilong ol 10-pela sumatin.

Mista Clough i tok Sir Brian Bell Foundation i amamas long sapotim ol wok bilong helt na edukesen long Papua Niugini. Olsem wanpela PNG kampani ol i givim moa long K15 milien pinis long sapotim dispela ol wok bihainim sut tingting bilong ol long helt na edukesen.

Makim maus bilong ol pipel bilong Bundi, Dairekta bilong Kumura Faundesen, Vincent Kumura i tok bikpela tenkyu tru long Brian Bell Foundation long dispela bikpela sapot ol i givim long ol pipel bilong Bundi.

Rosa Koian i raitim