Miss Pacific Ailan 2018-2019 Leoshina Kariha i nau kamap embeseda o maus meri bilong Institute ov Business Studies University (IBSU) long sapotim na strongim ol meri long Papua Niugini.

Em bai wokbung wantaim IBS na kamap gutpela piksa bilong olgeta sumatin long IBSU.

“Mipela i amamas long Miss PNG na Miss Saut Pacific 2018-2019, Leoshina Kariha long kamap maus meri bilong IBS,” Developmen Menesa bilong IBS Group na meri bilong faunda bilong IBS Group, Jenny Nades i tok.

“Faunda bilong IBS grup, Mick Nades i gat laik na driman long givim save long ol yangpela long divelopim kantri.  Wanpela driman bilong en tu long givim save long ol yangpela meri na bai ol i ken i go na givim save long ol famili bilong ol na bildim, famili, komyuniti na  kantri tu.”

Em i tok tenkyu long Miss Pacific Ailan na Miss Pacific Ailan Pejen (MPIP) long wokbung wantaim ol long mekim dispela driman i kamap.

Tasol Miss Leoshina Kariha i tok, em i bikpela salens long em i kisim dispela wokmak bikos em i gat skul wok bilong en tu. Em i winim wanpela skolasip long Yunivesiti bilong Hawai tasol bikos long COVID-19 em bai stap long PNG na skul long intanet. Tasol, long narapela sait, em i tok em i amamas long kisim dispela wokmak tu bikos em i tok em i gat laik long skul na helpim ol narapela sumatin wantaim.

“Mi amamas long kisim dispela wokmak maski mi gat skul wok bilong mi tu long mekim. Bikos mi laik long skul wantaim na helpim ol arapela na taim mi pinisim skul bilong mi na greduet, mi laik lukim olsem ol narapela tu i mekim wankain,” Leoshina Kariha i tok.

Faunda Mick Nades i tok IBS i stap 32 krismas long PNG na em i tok tenkyu long Miss Kariha long tok orait long kamap maus meri bilong IBS.

Rebecca Negere i raitim