OL 1st yia sumatin bilong Divine Word University i bin kisim nupela laptop bilong yunivesiti long las taim tasol.
Dispela em wanpela polisi bilong dispela pepales yunivesiti. DWU em wanpela institutsen tasol insait long Papua Niugini i save givim laptop long olgeta nupela sumatin bihain long ful rejistresen.
Presiden bilong DWU Profesa Pater Philip Gibbs SVD i tok dispela yunivesiti i bin lusim K1.7 milien long baim ol laptop na givim long olgeta 1st yia sumatin husat i bin pinisim skul fi bilong ol long dispela yia.
Profesa Gibbs i tok dispela yunivesiti i save givim laptop olgeta yia bikos em polisi bilong yunivesiti long trenim ol sumatin long groim global digital revolusen na tu long strongim DWU digital tising na lainim insait long kantri.
“Dispela hap bilong teknoloji yu kisim tude bai stap wantaim yu inap yu pinisim 4-pela yia bilong yu long DWU,” Profesa Gibbs i tok.
Em i tok dispela laptop bai helpim long stadi taim ol stap long yunivesiti.
Dispela laptop i gat nupela Windows opereting sistem na narapela software stap insait wantaim, olsem Microsoft Office, em yunivesiti Infomesen na Komyunikesen Teknoloji (ICT) Sevis Divisen i bin putim insait.
Ol laptop bai helpim ol sumatin long go insait long Yunivesiti tising na learning risos na tu long Intanet na Yunivesiti Intranet sevis 24/7 long taim bilong stadi program.
Jacklyn Kimala i raitim
wantokniuspepa.com