DIVINE Word University i surukim namba 39 Greduesen Seremoni bilong ol long neks wik Fraide 12 Mas, long rispektim Gren Sif Sir Michael Somare.

Dispela greduesen seremoni bai nau kamap long wik antap Fraide 19 Mas, 2021.

Presiden bilong DWU Profesa Pater Philip Gibbs SVD i bin tokaut long disisen bilong Yunivesiti Kaunsil long las wiken.

“Bihain long konsaltesen wantaim ol Kaunsil mi ken tok orait long surukim dispela DWU Greduesen deit i go Fraide 19 Mas, 2021,” Profesa Gibbs i tok.

“Planti bilong ol famili husat i plenim trevol pinis na haus long dispela greduesen deit bai surukim gen plen bilong ol.”

“Mipela bai no inap holim greduesen long opisal taim bilong Papa bilong dispela Nesen na pren bilong DWU,” Profesa Gibbs i tok.

Em i tok long Mande 1 Mas, na Fraide 12 Mas em tupela pablik holide bilong rispektim Sir Michael Somare, namba wan Praim Minista bilong Papua Niugini husat ol bin kolim “Papa bilong Nesen”.

Profesa Gibbs i tok ol DWU komyuniti i joinim ol arapela komyuniti na provins long soim sori long dai bilong Sir Michael husat i bin bikpela pren bilong dispela Yunivesiti long planti yia i go pinis i no olsem Katolik Kristen tasol olsem nesenel lida.

“Ol Kaunsil, wokmanmeri na sumatin bilong DWU i joinim famili na ol pipel bilong PNG long rispektim dai bilong Gren Sif Sir Michael Thomas Somare,” Profesa Gibbs i tok.

“Sir Michael i bin kamap pren na bikpela sapota bilong DWU. Dispela Studen Sevis Building long DWU long Madang i bin kisim nem bilong em.

Profesa Gibbs i tok long Mande 1 Mas, ol SRC bilong DWU Madang Kempes bai go pas long kendel lait na sans long tok tenkyu long God long laip bilong Papa bilong dispela Nesen.

Jacklyn Kimala i raitim