DOKTA Paison Dakulala, Deputi Kontrola bilong Papua Niugini COVID-19 Nesenel Pandemik Rispon na bipo Seketeri bilong Helt i dai long Mande, Mas 1, 2021 long moning.

Polis Komisina na wanwok bilong en Kontrola bilong Papua Niugini COVID-19 Nesenel Pandemik Rispon, David Manning soim bikpela sori bilong en taim em i harim olsem Dokta Dakulala i dai long Mande moning.

“Mi sori tru long harim olsem dispela man husat i save daunim em yet na givim taim bilong en long mekim medikol wok, Dokta Dakulala i dai. Long las wanpela yia mitupela bin wokbung wantaim long i go pas long pait bilong PNG long daunim COVID-19 na mi lukim olsem em i wanpela  lida man bilong daunim em yet, em i gutpela pren na mento tu.

“Dokta Dakulala em i wanpela man husat i no save long tingim em yet maski em i sik, em i sanap wantaim mi na givim sapot na ol gutpela tingting taim mitupela i go pas long daunim pandemik long kantri we i bagarapim milien manmeri na pikinini long wol. Em i bin mekim planti samting long egeinsim COVID-19. Mi no bin bungim wanpela opisa husat i ken givim em yet olsem Dokta Dakulala. Em i save kea long ol pipel bilong yumi na em i givim olgeta bilong en long rispon bilong Gavman bilong PNG long COVID-19.

“Makim Maus bilong ol famili bilong mi na Royal Papua Niugini Konstabulari na ol opisa long Joint Ejensi Tas Fos, mi salim tok sori bilong mi i go long femili bilong Dokta Dakulala, Helt Seketeri Dokta Osborne Liko na ol wokmanmeri bilong Nesenel Dipatmen bilong Helt.

“Mi tok tenkyu tu long famili long wok we man bilong ol na papa bilong ol i mekim long pipel bilong Papua Niugini long pablik helt na tu long taim bilong rispon long COVID-19.

“Larim God i ken givim bel isi na strongim yumi olgeta taim yumi stap insait long sori,”Kontrola Manning i tok.