OL HET tisa na ol het masta bilong ol skul i mas bihainim ol lo we wan wan ol provinsal edukesen bod i makim, wanpela senia opisa i tok.

Ol skul i no ken bihainim laik bilong ol yet o long ol skul bod na sasim ol skul na projek fi.

Michael Ova, Seketeri bilong Nesenel Katolik Edukesen Opis long Pot Mosbi i mekim dispela tok long las wik long taim Edukesen Dipatmen i saspendim sampela het tisa na prinsipal bilong ol skul long kantri bikos Dipatmen i tok ol skul i abrusim mak ol provinsal edukesen bod (PEB) i bin makim long ol skul na projek fi.

Moa yet, Dipatmen i sutim tok long ol prinsipal tu olsem ol skul i rausim na pasim ol sumatin husat i no baim skul fi long ol i no ken go long skul.

Tasol Mista Ova i tok opis bilong em bai hat long pait long rait bilong ol prinsipal sapos ol prinsipal i brukim lo.

Em i mekim dispela tok long taim Edukesen Dipatmen i saspendim ol prinsipal bilong ol skul olsem Mt Daimond Seven De Edventis Sekenderi Skul ausait long Pot Mosbi, Tusbab Sekenderi, Karkar, Malala na Holi Spirit Sekenderi Skul wantaim Divine Mercy Haiskul na Divine Mercy Praimeri Skul long Madang Provins.

“Edukesen Dipatmen i gat rait long mekimsave long ol prinsipal, ol tisa na ol skul husat i brukim lo na i no bihainim ol tok ol provinsal edukesen bod i kamap,” Ova i tok.

“Ol het tisa tu i no ken harim tok bilong ol skul bod na ol papamama long sasim ol fi long mak bilong ol yet.

“Ol i mas bihainim ol disisen bilong PEB na tok nogat long toktok bilong skul bod.”

Mista Ova i sori tu olsem gavman tuisen fi sabsidi ((TFS) i no save kamap long ol skul hariap o long taim bilong skul i stat tasol i tok dispela i bikpela salens bilong ol skul.

Em i tok bikos long dispela kain salens, ol skul i mas painim ol arapela rot bilong kamapim mani o sevim mani olsem ol i no sot taim ekedemik yia i stat.

Edukesen Minista Jimmy Uguro long taim em i go raun long distrik bilong em long stat bilong dispela yia i tok ol skul i ken kisim ol projek fi tasol ol i mas bihainim stretpela rot o lo wantaim ol stia i stap.

Em i tok ol projek fi em ol provinsal Edukesen bod i kamapim na givim tok orait long em olsem elementeri - K5, praimeri - K7 na haiskul/sekenderi na ol vokesenel senta - K10.

Ol skul i no ken sasim ol fi antap long dispela ol mak.

Long stat bilong dispela mun Praim Minista James Marape i bin tokaut long givim K123 milien olsem TFS long ol skul tasol olsem ol ripot i kamap nau, planti skul i no kisim yet dispela mani.

Gavman pastaim long dispela yia i bin tokaut olsem ol papamama bai baim 37 pesen bilong skul fi na gavman yet bai baim 63 pesen bilong skul fi tasol i no longtaim i go pinis em i senis gen na tok ol papamama bai baim 63 pesen bilong skul fi na gavman yet bai baim 37 pesen bilong fi.