SAMPELA skul insait long Nesenel Kapital Distrik (NCD) i les long rejistarim ol sumatin na i wok long salim ol i go bek long haus bikos ol i laikim ol papamama i baim skul fi pastaim.

Dispela tingting i egensim toktok bilong Praim Minista James Marape olsem gavman bai baim skul fi bilong ol sumatin insait long kantri long helpim ol papamama bilong ol skul pikinini long elementeri i go long sekenderi.

Praim Minista Marape i givim K123 milien long Janueri 29 bilong namba wan kwata bilong K486 milien long Edukesen Minista Jimmy Uguro aninit long ‘Government Tuition Fees Subsidy (GTFS) sistem.

MP Marape i bin tok olsem ol papamama i no ken baim 37 pesen skul fi pastaim long salim ol pikinini bilong ol i go long skul.

Em i singaut long ol skul bod long no ken sasim moa long 20 pesen long skul fi. Ol skul mas rejistarim olgeta sumatin na ol i mas statim skul long taim.

“Wanpela komiti bilong Edukesen bai monitarim stat bilong ol tisa na sumatin,” wanpela man insait long Edukesen dipatmen i tokim niusman.

Komiti bai sekim ol nem lista bilong ol skul husat i rausim ol sumatin long taim bilong rejistresen bikos ol papamama i mas no ken baim skul fi long dispela yia.

Ol papamama i mas go givim nem bilong wanem ol skul i les long kisim ol sumatin bikos ol i no peim skul fi.

Edukesen Seketeri Dokta Uke Kombra bai putim aut toksave bilong GTFS isu na hau bai ol i ranim dispela skul fi sistem insait long kantri.

Tasol sampela skul bod i wok long kisim skul fi na projek fi long ol sumatin. Ol skul bod memba i singaut long Marape gavman long tok klia long tusen fi  isu.

Ol papamama i no klia yet na ol skul i wok long salim ol skul sumatin i go bek long haus.

Joseph Dawai i raitim