PLANTI papamama long Is Sepik Provins i kisim bel wari taim ol skul prinsipel long Brandi, Bishop Leo  na Mercy Sekenderi long taim ol i rausim ol sumatin i go bek long haus long i mas baim hap skul fi pastaim long ol i kisim spes.

Wanpela gred 11, sumatin bilong Bishop Leo Sekenderi Skul long husat no laik long givim nem i tok, planti sumatin i go bek long haus taim ol i kisim kain bekim long ol prinsipel bilong ol skul.

Ol i no amamas long wanem gavman i tok no gat tisa o skul i ken rausim sumatin long skul tasol skul i go het na rausim ol yet.

Gred 11 sumatin ya i tok olsem ol i kisim tok klia long Nesinel Gavman na Gavana Allan Bird, long go long skul wantaim hamas ol i gat na larim sumatin statim klas tasol dispela i no wok olsem.

Em i tok, mipela planti kam long famili we tripela o foapela pikinini go skul na i hat tru long papamama. Na tu las yia klostu coronavirus i bagarapim mipela gut na mekim hat long ol papamama maket na bungim skul fi.

Gred 11 sumatin ya i tok moa olsem sapos skul i ken rejistarim ol wantaim hamas ol i kisim i go em bai orait, na bihain ol i pinisim hamas i stap long yet."

Em i tok ol i amamas  long disisen bilong Nesenel gavman long helpim papamama bilong kantri long kain taim we sik coronavirus i bagarapim wok bisnis na maket.

Jonathan Poema i raitim