SIF Ekseketiv Opisa bilong Pot Mosbi Jeneral Haus Sik, Dokta Paki Molumi i tok dispela yia ol i laik apim mak bilong kaikai ol i save givim long ol sikmanmeri na pikinini wantaim ol gutpela helti kaikai long gaden.

Em i tok, long ol yia i go pinis, POMGEN i save givim skon, bret na melen long ol sikmanmeri na pikinini long haus sik.

“Mipela i save olsem givim gutpela helti kaikai we i gat planti nutrien em i bikpela samting na i wankain olsem givim marasin. Olsem na long dispela yia, menesmen i mekim plen long givim gutpela helti kaikai long ol sikmanmeri na pikinini,”Dokta Molumi i tok.

Em i mekim dispela tok taim em i lukim olsem Trukai Industries Limited i wok long patna gut tru wantaim POMGEN long las yia long mun Julai i kam inap dispela mun Februeri 2021. Trukai Industries i wok long sapotim POMGEN wantaim ol rais bek olsem na Dokta Molumi i laik patna gen wantaim ol lokal fama long kisim ol gaden kaikai na kukim wantaim rais na givim long ol sikmanmeri na pikinini long haus sik.

“Mipela i laik apim mak bilong kaikai ol i save givim long ol sikmanmeri na pikinini wantaim ol gutpela helti kaikai long gaden. Mipela i bai patna wantaim ol lokal kumu fama long ol i ken saplaim haus kuk bilong POMGEN wantaim ol kumu long gaden we i bai go gut wantaim ol rais we Trukai Industries i saplaim.

“Mipela i amamas long kain sapot bilong Trukai Indastries bikos gavman i katim 2021 baset bilong POMGEN.

“Mipela bai askim ol sikmanmeri na pikinini long baim liklik fi tu taim ol i kam long haus sik long POMGEN. Dispela fi bai helpim long baim ol kumu na abus tu we bai gut wantaim rais. Ol sikmanmeri na pikinini bai kaikai gutpela kaikai taim ol i stap long haus sik bikos ol i baim fi,” Dokta Molumi i tok.

Long stat bilong mun Februeri, Trukai Industries i givim 300 kilogrem bilong rais long POMGEN long kukim na givim ol sikmanmeri na pikinini.