WANPELA medikol tim bilong Chimbu provins nau i stap long Madang provins bihainim askim bilong Madang Gavana Peter Yama long karimaut wok painim bilong em yet long namba bilong ol COVID-19 long provins.

Gavana Yama i bin tokaut olsem em i askim ol dispela  medikol tim bilong Chimbu Provinsal Helt Atoriti long karimaut wok painim long sekim gut namba bilong ol positiv COVID-19 keis long Madang bikos em i no bilip olsem namba bilong dispela sik i go antap hariap tru long sotpela taim tasol.

Mista Yama i bin mekim dispela toktok taim em i bung wantaim ol medikol dokta na Madang COVID-19 Rispons tim long las wik Fonde.

Em i tok, em i no bilip tru olsem taim em i stap long Madang provins, i nogat COVID-19 keis na insait long sotpela taim em i go aut long provins namba bilong COVID-19 positiv keis i sut i go antap hariap tru.

Long stat bilong dispela mun Februari, Sif Ekseketiv Opisa (CEO) bilong Madang Provinsal Helt Atoriti, Fidelis Waipma i bin tokaut long namba wan positiv COVID-19 keis long Madang. Tasol insait long sampela de tasol namba bilong positive COVID- 19 keis i sut i go antap long 17 na bihain namba i go antap gen long 27.

Long Tunde dispela wik, Madang Provinsal Helt Atoriti i soim olsem namba bilong positiv COVID-19 keis long Madang i sut i go antap long 35.

Maski olsem namba i sut i go antap manmeri long pablik long Madang taun na ol rurel ples i wokabaut raun nomol tasol i stap. Ol i no pret na planti i no werim mask na wokabaut raun.

Madang provins i no gat wanpela aisolesen senta o wod we ol positiv COVID-19 lain i ken go stap na kisim marasin, olsem na ol dokta i salim ol lain husat i gat COVID-19 i go long wan wan haus bilong ol na stap long self-aisolesen.

Mista Yama i tok, ol dokta long Madang na Madang Provinsal Helt Atoriti i no ken giaman na givim nating namba bilong ol sik lain wantaim COVID-19 i go antap. Ol i mas bihainim stretpela pasin long wok bilong ol na tokaut long trupela tok tasol na no ken kamapim pret long komyuniti long Madang.Ol i no ken giaman long tok olsem COVID-19 positiv keis bilong Madang i go antap na laikim Gavman bai givim mani tasol long ol long kaikai na mekim wok na ol bai kaikai tasol.

By James G. Kila