STRONGIM ol pasin bilong Nupela Nomol long ol wokples nau yet.

Ekting Sif Ekseketiv Opisa bilong Wes Sepik Provinsal Helt Atoriti, Alphons Yalim i mekim dispela toksave i go long ol Menesmen bilong ol Bisnis Haus, ol stoa na ol lain bilong givim sevis Wes Sepik.

Em i mekim dispela toksave tu long ol PMV opereta olsem bas na teksi long Vanimo, ol opis bilong gavman long Vanimo na ol NGO i stap long Vanimo.

Em i tok long Februeri 13, 2021, provins i tokaut long namba 3 keis bilong COVID-19. Tasol namel long kontek tresing ol i luksave long 13 keis we i nupela na planti bilong ol em ol franlain helt woka.

Saundaun Provins i putim sampela lo long daunim COVID-19 autbrek na wanpela bilong ol em long daunim ol sevis.

Mista Yalim i tok i luk olsem i gat komyuniti trensmisen bilong COVID-19 long Vanimo tasol ol i wet tasol long test bai tokaut sapos em i tru.

“Em i bikpela samting long yumi olgeta i bihainim ol lo bilong COVID-19 we i stap pinis na i no nupela o i hat,” Mista Yalim i tok.

Em i tok, putim ol samting bilong wasim han long wokples na ol wokmanmeri, ol patna na ol kastoma i ken wasim han. Bihainim lo bilong stap 1.5 mita longwe long narapela insait long wokples. Sapos dispela i no inap, orait karamapim pes wantaim mask. Sapos ol wokmanmeri, patna o kastoma i soim sain bilong skin hat o kus, askim ol isi tasol long i go kisim test long Sandaun Provinsal Haus Sik. Na tu olgeta wokmanmeri, patna na kastoma i mas kus i go insait long hanskru.

“Taim yumi bihainim ol dispela lo, bai yumi ken daunim mak bilong COVID-19 long kalap i go i kam kwik taim.

“COVID-19 i bagarapim mipela long kain kain rot na i wok long i go het long bagarapim mipela. Em i taim nau long yumi mas sanap wantaim na prektisim ol pasin bilong nupela nomol na lukautim yumi yet na ol komyuniti,” Mista Yalim i tok.

Rebecca Negere i raitim