Australia bai wok klostu wantaim gavman bilong Papua Niugini long sapotim ol plen bilong
en long givim sut marasin bilong COVID-19 long ol manmeri na pikinini long PNG.

PNG nau i gat 955 keis bilong COVID-19 na 10-pela dai i kamap long COVID-19.
Namba 10 dai bilong COVID-19 em wanpela man long Yangoru long Is Sepik Provins. Em bin soim ol
sain bilong COVID-19 olsem skin hat, kus, pen i kamap long bros na sotwin na em bin i go slip long
Angau Memorial Haus Sik long Janueri 28, 2021.
PNG em i wanpela bilong ol 92 diveloping kantri we Gavman bilong Australia i givim K215,
928, 800 milien long Advance Market Commitment (AMT) bilong COVID-19 Veksin o sut
marasin (COVAX) long helpim ol dispela 92 kantri long kisim seif na gutpela COVID-19 sut
marasin na banisim ol pipel long COVID-19.
Gavi, Coalition fo Epidemic Preparedness Innovation (CEPI) na World Health Organization
(WHO) i go pas long lukautim COVAX. Long wanpela kantri bai inapim mak bilong kisim
COVAX, em i mas i gat wanpela plen long givim dispela sut marasin long ol pipel bilong en
na dispela plen i mas gutpela na i kisim tok orait.
Tasol wanpela ripot i soim olsem i nogat wanpela mani bilong plen bilong givim sut marasin
bilong COVID-19 long 2021 baset bilong PNG.
Gavi COVAX na WHO i mekim sampela teknikol asistens i redi long sapotim ol kantri long
mekim plen bilong ol long karimaut COVID-19 sut marasin na tu sekim plen bilong ol long
givim tok orait.
Wanpela kampani ol i kolim Abt Associates i kisim kontrak wantaim Gavi long skelim ol
COVID-19 sut marasin long 24 kantri taim GAVI i painim wanpela gutpela sut marasin bilong
COVID-19. Na PNG em i wanpela bilong ol dispela 24 kantri.
Nainpela sut marasin bilong COVID-19 we Gavi i putim ai long baim em ol i stap yet long
divelopmen proses na 7-pela em ol i kamap pinis tasol ol i wok long mekim test long ol i
stap.
Sapos ol i wanbel long wanpela bilong ol dispela sut marasin orait ol i bai baim na givim long
Abt Associates na em bai givim long ol kantri husat i mekim plen bilong givim sut marasin na
dispela plen i mas kisim tok orait pastaim.

Rebecca Negere i raitim