OL pikinini na famili bilong Lady Veronica na Sir Michael Somare i singaut long pablik olsem i
mas no gat wanpela visita long haus bilong Lady Veronica na Sir Michael long Pot Mosbi.

Ol i mekim dispela toksave long stopim kain kain toktok we i ken kamap long sosel midia
long ol sampela samting ol i bai mekim long redim Lady Veronica na Sir Michael bipo long
tupela i go kisim helpim long ol haus sik long ovasis.
Ol famili bilong tupela i bin helpim tupela long kisim helpim long Pot Mosbi Jeneral Haus Sik
na Pacific Intanesel Haus Sik (PIH) na ol i amamas long gutpela wok ol wokmanmeri bilong
dispela tupela haus sik i mekim long papa na mama bilong ol.
Tasol ol famili i tok, krismas bilong tupela papa na mama i go antap tru olsem na ol i laik
tupela i mas i go kisim helpim long ol haus sik long ovasis.
Bikos long hevi bilong COVID-19, Lady Veronica na Sir Michael i mas bihainim sampela
strongpela lo bipo long ol i bai kisim tok orait long raun i go long ovasis. Olsem na ol famili
bilong tupela i tokaut long pablik olsem bai no gat visita long haus bilong tupela long
bihainim lo bilong COVID-19.
Ol Somare famili i askim pipel bilong Papua Niugini tu long beten long gutpela helt bilong
mama papa bilong ol husat i stap long lewa bilong ol na tu long lewa bilong planti manmeri
na pikinini long kantri.