PLANTI skul long kantri i no kisim yet tuisen fi sabsidi (TFS) long dispela yia.

Madang Katolik Edukesen Edvaisa, Bruno Tulemanil i tok bikos long dispela ol skul i askim
ol sumatin long ol i mas baim skul fi pastaim.
Em i mekim dispela tok long dispela wik long taim Dipatmen i saspendim ol prinsipal bilong
foapela ejensi skul long las wik bikos Dipatmen i sutim tok long ol i rausim ol sumatin husat i
no bin baim ol skul na projek fi bilong 2021 skul yia long go long skul.
Dispela ol skul em Malala Sekenderi Skul, Holy Spirit Sekenderi (Bogia), Divine Mercy
Haiskul na Divine Mercy Praimeri Skul (Megiar, Sumkar).
Mista Tulemanil i tok ol skul i mas baim pawa, wara, ol buk, pepa, sok, dasta, rula na ol
arapela samting bilong skul long wok.
Em i tok ol skul i mas baim dispela ol samting long wok.
“Sapos nogat mani, ol skul bai wok olsem wanem?” Tulemanil i tok.
“Ol skul i mas kisim tuisen fi sabsidi pastaim tasol dispela i no save kamap long taim.
“Dispela i bikpela wari na hevi bilong ol skul.”
Tulemanil i tok em i orait long Dipatmen i givim instraksen long saspendim ol prinsipal tasol
em i mas painimaut gut long watpo ol skul i laikim ol sumatin i mas baim skul fi pastaim
bipo long ol i go long skul.
Wantok Niuspepa i bin kontekim Limana Vokesinel Skul long Pot Mosbi we em i stap long
Godwit Strit, Gordon na i stap olsem 2 kilomita longwe long Fincorp Haus, we Edukesen
Dipatmen hetopis i stap na painimaut olsem skul i no kisim yet TFS bilong em.
Opis edministresen i tok kain mani i save kamap long skul klostu long pinis bilong namba
wan tem bilong skul.
Dispela i soim ol skul bai kisim mani long pinis bilong mun Mas o long stat bilong Epril.
Marape Gavman long stat bilong dispela mun i tokaut long em i givim K123 milien olsem
namba wan hap bilong TFS bilong dispela yia long ol skul tasol inap nau, olsem ol ripot i tok,
dispela mani i no go yet long ol skul.