SKUL yia bilong 2021 i stat tasol sori tumas inap long 199,000 sumatin i abrus long go het
long skul bilong ol.

Dispela ol sumatin i no kisim ples long mekim Gret 9, Gret 11 na go long ol koles o
yunivesiti.
Dispela em toksave bilong wanpela senia edukesen opisa.
Bruno Tulemanil, Edukesen Seketari bilong Madang Katolik Edukesen opis i tokim Wantok
Niuspela long Tunde olsem long Madang, inap long 18,000 sumatin i bin sindaun long Gret 8
eksamininesen we 6000 i kisim pas mak long go het long skul bilong ol.
Tasol ol i ksim tasol 3000 bikos i no gat spes long kisim olgeta i go long haiskul na sekenderi
skul.
Long Katolik ejensi skul ol i save kisim 160 o 180 sumatin long go long ol tripela sekendari
skul na wanpela sekendari skul aninit long Katolik Edukesen ejensi long provins long mekim
Gret 9 .
Ol tripela Katolik sekendari skul long provins em Malala, Brahman na Holi Spirit na wanpela
haiskul, Megiar Divine Mercy Haiskul.
Dispela i no kisim ol gavman haiskul na sekendari haiskul olsem Tusbab, Good Shepherd,
Raikos, Karkar na Aiome Sekendari skul.
Mista Tulemanil i tok dispela namba bilong ol drop aut bai go antap moa sapos ol i skelim
olgeta Gret 8 sumatin husat i sindaun long eksaminesen na namba bilong ol haiskul na
skenderi skul long provins.
Em i tok i no gat ples bilong kisim ol sumatin i go long skul maski sapos skul mak bilong ol i
antap long kat ov mak em 80 pesen long go long haiskul o sekendari skul.
Em i tok planti papamama i kamap long opis bilong ol na i askim long wanem as pikinini
bilong ol, maski i kisim gutpela mak, i no kisim ples long go long Gret 9.
Em i tok ol i save tokim ol long painim ol arapela skul long putim pikinini bilong ol i go
insait.
Sapos dispela i tru, i gat bilip wankain hevi i stap long ol arapela 20 provins long kantri.
Jonathan Kena, husat i bin tisa long Brugam Sekenderi Skul long Maprik, Is Sepik i tok kain
hevi i kamap long skul tu em sampela papamama i kamap na askim ol long kisim pikinini
bilong ol.
Em i tok ol i gat foapela klasrum na i save kisim tasol 40 sumatin long wanpela klas.
Long wan wan yia long nesenel level, moa long 212,340 sumatin i save sindaun long ol
nesenel eksaminesen bilong Gret 8, 10 na 12.
Mista Kena i tok dispela em bikpela hevi bilong gavman na sapos gavman i no stretim, em
bai kamapim bikpela hevi.
“Mipela i wok hat long kisim ol pikinini na lukim ol i pinisim gut skul bilong ol,” em i tok.
“Tasol taim gavman i pasim ai, dispela i taim bom i stap na redi long pairap.”

Paul Zuvani i raitim