SELEKSEN bilong ol sumatin i go long sampela ol institusen insait long kantri i soim olsem ol skul long
rural eria i no bin mekim gut long gret 12 ekem bilong ol.

Faivpela skul bilong ol eben senta insait long nesen i bin mekim gut long ol fainel eksem bilong ol, i
kisim ol spes bilong ol namel long 180 haia institusen insait long kantri.
Ol dispela skul em; Pot Mosbi Nesenel Hai skul, Goroka Sekenderi skul, Mt. Hagen Sekenderi skul,
Mt. Hagen Day Skul, Sogeri Nesenel Hai Skul em planti bilong ol i bin selektim i go long ol Yunivesti
na koles.
Edukesen risal i soim olsem planti bilong ol rural skul i nogat o ol liklik lain tasol i kisim sans long go
long neks level bilong stadi long dispela yia.
Kombolopa Sekenderi skul long Baiyer Distrik, Westen Hailens Provins i wanpela skul namel long
rural skul i no bin mekim gut long ol skul wok bilong ol.
Het tisa Joseph Paraka i tokim niusman olsem ol rural skul i no bin pefom gut bikos i no gat gutpela
fesiliti bilong helpim ol sumatin i lainim gut samting olsem sampela skul long eben eria.
Paraka i tok ol nupela skul o top ap skul i no gat gutpela metirel bilong ol sumatin long yusim.
Em i tok planti sekenderi skul gavman i wokim nupela, em planti ol pikinini i pinisim gret 12 tasol na i
stap nating.
Paraka i tok klia olsem planti ol metirel bilong ol tisa olsem tisa menuel na ol sapot risos olsem
intanet fesiliti long lainim ol sumatin gut i no stap.
“Ol sumatin tu i no gat gutpela risos bilong lainim olsem teks buk bilong wan wan sumatin long
sapotim ol long stadi gut.
“Long ol boding skul planti ol sumatin i no gat ples bilong slip na bilong kisim gutpela kaikai
wantaim,” em i tok.
Paraka i askim nesenel na provinsal gavman long luksave long ol dispela kain hevi na hariap long
stretim pastaim long ol pikinini i kisim gutpela save long kantri bilong yumi.

Joseph Dawai i raitim