Evangelical Lutheran Church PNG (ELCPNG) i sapotim disisen bilong Nesenel Edukesen Seketeri Uke
Kombra long rausim setifiket bilong ol 620 tisa bilong elementeri skul.

Nesenel Sios Seketeri Bernard Kaisom i tok em bai i kisim dispela wok mak long klinim Balob Tisa Koles
long Lae na apim gut nem bilong en gen.
Em i tok em i gat infomesen olsem sampela leksera bilong dispela tisa koles na sampela opisa bilong sios
edministresen opis tu i stap insait long kamapim dispela bagarap long Balob Tisa Koles.
Em i tok tim bilong em bai i lukluk tu long gavanens na ol sistem we ol i save yusim long kisim ol non-skul
liva long koles.
“Wok tisa em i bikpela wok na ol tisa i mas save gut long ol samting pastaim long ol i ken lainim ol
sumatin,” Seketeri Kaisom i tok.
Ol paul pasin long Balob Tisa Koles i kamap ples klia taim ol sumatin husat i bin greduet long 2019 na
2020 i bin kamap long skul edmistresen long Ampo na askim long ol setifiket bilong ol.
Long dispela taim tu prinsipel bilong Balob Tisa Koles bai i kisim sas bihainim dispela ol ripot.