NESENEL Pandemik Kontrola na Polis Komisina David Manning i givim strongpela tok lukaut long olgeta provins long apim wok bilong ol long stopim COVID-19 na daunim bikpela namba bilong COVID-19 keis.

“Mipela i bin mekim gut stret long taim sik i stat, tasol sapos yumi no tingting gut bai yumi i go insait long hevi we bai yumi no inap long helpim yumi yet,” Kontrola Manning i tok.

“PNG i no gat strongpela helt sistem olsem ol arapela develop kantri olsem na privensen o pasin bilong abrusim sik em i wanpela rot tasol long bai yumi stopim sik. Yumi mas harim tok na bihainim ol lo bilong nupela pasin.

“Mi singaut tu long olgeta helt woka na ol lain husat i stap long ol menesmen posisen long ol Provinsal Helt Atoriti long helpim provins bilong ol na kantri wantaim,” Kontrola Manning i tok. 

Em i mekim dispela tok bihain long ol helt opisa i sutim tok long rispon bilong West Nu Britan (WNB) Provins long namba bilong COVID-19 keis long provins i go bikpela.

Ol helt opisa i tok rispon bilong provins long COVID-19 i daunbilo tru bihain long namba wan keis i bin kamap long provins long Novemba las yia. Long dispela taim i kam inap long nau, ol COVID-19 keis long provins i wok long go antap moa yet.

Wanpela medikol tim long Nesenel Kontrol Senta i bin i go long WNB long Novemba 2020 long mekim wokpainim long namba bilong COVID-19 keis i wok long go antap. Ol i bin go gen long Janueri 6 i go inap long Janueri 22, 2021.

Ripot ol i bringim long dispela tupela raun i soim liklik progres long rispon maski Kontrola David Manning i putim Stet Ov Imejensi long Janueri 1 na lokdaun long WNB long Janueri 2.

Ripot i tok, “Bikpela asua ol i lukim em rispon i no kam gut. Ol i isi isi na ol i no gat klia lidasip. Liklik senis tasol i bin kamap long namba wan taim ol i bin go lukim.”