OL 1638 wokmanmeri long Pot Mosbi Jeneral Haus Sik (POMGEN) i ken sindaun gut nau long nupela 26 sita bas na i go i kam long wok long dispela bikpela level 7 haus sik long kantri.

Las wik, Moni Plus i givim wanpela 26-sita bas i go long POMGEN long helpim ol wokmanmeri. Sif Ekseketiv Opisa bilong POMGEN Dokta Paki Molumi i tok i gat nid long transpot bilong ol wokmanmeri bilong haus sik.

“Em i bikpela samting long lukautim gut ol wokmanmeri bilong mipela bikos ol i mas i stap gut na pilim gut taim ol i kam long wok long lukautim ol sikmanmeri. Olsem na taim CEO bilong Moni Plus i askim mi long nid bilong haus sik, mi tok mi nidim helpim bilong lojistik na transpot,” Dokta Paki Molumi i tok.

Em i tok POMGEN i save sevim Nesenel Kepital Distrik, Sentral Provins, Galp Provins na ol riferal keis i kam long ol arapela provins. Em i gat 1638 wokmanmeri tasol long helpim ol sikmanmeri.

Dokta Molumi i amamas long helpim bilong Moni Plus. Em i tok POMGEN i gat 6-pela bas i save karim ol wokmanmeri i go i kam long wok. Tasol ol dispela bas em ol i stap 6 o 7 yia na ol i olpela pinis.

Em i tok Haus sik i save helpim moa long 1 milien pipel na ol wokmanmeri tu i save stap longwe tru olsem long Laloki na i go i kam long wok. 

POMGEN i gat 3-pela sift we ol wokmanmeri i save mekim long wan wan de. Ol i save i kam long wan wan taim ol i makim bilong ol long wok long 8-pela aua. Dispela nupela bas i ken helpim ol moa na ol i ken i go het long mekim gut wok bilong ol.

Siaman bilong Moni Plus, Aho Baliki i tok Moni Plus em i wanpela fainensal sevis provaida na dispela bas ol i givim long POMGEN em i wanpela bikpela donesen ol i mekim long dispela yia.

“Mipela i pilim olsem mipela i gat wokmak long sapotim ol komyuniti na haus sik long givim sevis long taim na mekim gut wok bilong ol,” Mista Baliki i tok.

Rebecca Negere i raitim