EDUKESEN Dipatmen bai i no inap kisim ol nupela greduet tisa long tis long ol elemteri skul long wanem ol dispela tisa i no bihainim stretpela rot long kamap tisa.

Ol i no inap kisim ol nupela tisa long wanem ol i bin yusim ol giaman setifiket na braib long go insait long tisa koles, ol GPA mak bilong ol i daunbilo tru na ol i no bin soim gret 10 o 12 setifiket bilong ol.

Insait long wanpela sekula Edukesen Seketeri Dokta Uke Kombra i tok wok tisa em i wanpela impoten wok bikos em i helpim pikinini long gro wantaim gutpela save long tingting na pasin bilong en.

Em i tok Ministri bilong Eduksen i painimaut olsem sampela tisa i yusim korap o giaman pasin long kamap tisa.

“Edukesen Dipatmen bai i no inap larim ol tisa husat i yusim ol giaman pepa long kamap tisa long wok tisa na ol bai i rausim setifiket bilong ol.

“Mipela i mekim olsem long holim gutpela nem bilong dipatmen na edukesen bilong ol pikinini bilong mipela,” Dokta Kombra i tok.

Edukesen Dipatmen i stat putim aut pinis lista wantaim nem bilong ol tisa husat em i rausim ol setifiket bilong ol.

Seketeri Kombra i tok stat long Trinde Janueri 27, dipatmen i rausim ol tisa husat i mekim giaman pasin na kisim trening bilong wok tisa long ol tisa koles, bai i no inap kisim apoinmen long wanpela skul, bai i no inap go bek long wok tisa na dipatmen bai i rausim ol long peirol.

Bihainim lo aninit long Criminal Code Act husat man o meri i yusim hanmak bilong narapela long olsetifiket o ol pepa bilong skul, o i yusim stemp bilong ol opis, i mekim rong na sapos ol i no stretim dispela pasin i brukim lo bai ol i ken go kalabus inap tripela yia.