GIVIM buk na strongim tingting bilong ol pikinini taim ol i liklik yet em i bikpela samting tru.

Dispela em tok bilong 2020 East New Britain Students Association (ENBSA) long UPNG, Tommy Joseph Varkolono.

Varkolono i tok taim ol pikinini i lain long rit taim ol i stap liklik yet, dispela pasin bai pas strong long ol na bai i helpim ol long lainim gut ol samting long skul bihaintaim.

Moa yet taim ol i rit planti na lainim planti samting ol i ken yusim dispela ol save long mekim sindaun bilong ol i kamap gut, o surik go long gutpela mak tu.

Varkolono i mekim dispela tok taim Wantok Niuspepa i askim em bilong wanem tru em na ol wanskul bilong em i givim aut ol buk long ol skul long Is Nu Briten.

Em na ENBSA i laki long kisim sampela buk, 4-pela palet na tilim long 15 skul, long Is Nu Briten. South Pacific School Aid long Australia i bin harim singaut bilong ol na helpim wantaim ol buk.

Em i tok dispela ol buk bai i helpim sampela sumatin long winim mak bilong skul long yunivesiti long bihaintaim.

Bikpela driman bilong yangpela Tommy em long lukim Is Nu Briten i kamap wanpela namba wan provins.

“Nau yet PNG i luksave long Is Nu Briten olsem wanpela model provins. Na mipela i laik olsem wantaim helpim bilong ol buk dispela provins bai surik go long narapela level.

“Mipela laikim planti moa sumatin long ol rurel ples i mas go long yunivesiti na koles. Na ol i ken kam bek long ples na apim standet bilong ples bilong ol i go long narapela mak. Dispela mipela I bilip em i ken kamap sapos planti sumatin na ol yangpela i kamapim gutpela pasin bilong rit.

“Em i gutpela taim bilong ol papamama i mas helpim ol pikinini bilong ol tu long stat mekim pasin bilong ritim buk i kamap strong long famili bilong ol,” Varkolono i tok.

Dispela em i namba tu projek ol yangpela bilong Is Nu Briten i mekim long helpim ol komyuniti bilong ol.

Las yia ol i bin givim aut ol lait bilong rit.

Varkolono em bai i mekim fainel yia long Politikel Saiens stadi bilong em dispela yia.