OLGETA tisa bilong PNG i mas kisim pe long taim na bai ol i amamas long lainim ol sumatin gut insait long klasrum na ausait wantaim,” Wanpela yangpela tisa man na olpela sumatin bilong Madang Tisa Koles Sailas Max i bin tokim Wantok Niuspepa.

“Long makim maus bilong olgeta yangpela tisa man na meri husat i bin greduet pinis long 2017 i kam antap long 2019 long ol Tisa Koles olsem Madang i no bin kisim pe bilong ol na sampela i bin hatwok nating inap tupela yia,” Mista Max i tok.

Max i tok planti nupela greduet i bin skulim ol pikinini nating na givim hatwok long ol praimeri skul gen long lukautim ol wantaim kaikai na mani.

“Mipela i laik save bilong wanem na mipela i no kisim pe hariap na tu dispela tisa wok i no isi long sanap long blakbot na skulim ol pikinini,” em i tok.

Olgeta praimeri na haiskul tisa i mas kisim pe bikos ol i as bilong edukesen, na tu ol bai givim kwaliti edukesen long ol pikinini.

Em i tok dispela hevi bilong pe i bin givim hat taim long ol tisa tasol ol i no bin les long wok bilong ol inap sampela i kisim hap pe.

“Mipela askim nupela Minista bilong Haia Edukesen na Risets na Sains Teknoloji, Wesley Raminai long luksave long dispela hevi bilong ol nupela greduet bilong ol tisa koles na stretim pe bilong ol hariap,” em i tok.

Jacklyn Kimala i raitim