MADANG Provinsal Helt Atoriti (MPHA) long las wiken i putim aut wanpela notis olsem olgeta manmeri long Madang taun i mas werim mask na raun bikos Modilon Haus Sik i ripot olsem i gat wanpela meri i gat sik COVID-19 o coronavirus.

Dispela em namba wan Covid-19 keis long Madang provins.

Sif Eksekutiv Opisa (CEO) bilong MPHA, Fidelis Waipma i tok dispela COVID-19 keis em namba wan long provins na dispela em wanpela komyuniti trensmisin na meri ya i save stap long wanpela setelmen arere long Madang taun.

Mista Waipma i tok dispela namba wan keis em komyuniti trensmisen na i gat bikpela wari nau olsem i gat sampela lain moa ating i gat dispela sik nau i stap. Olsem na ol pipel long Madang i mas was gut long helt bilong ol na werim mask oltaim taim ol i muv raun long Madang taun.

Em i tok tu olsem Modilon Jeneral Haus Sik nau bai tambu long ol lain i go insait nating. Olgeta lain husat i laik go long haus sik i mas werim mask. Moa long en tu ol i mas wasim han long tep wara wantaim sop we i stap long geit bilong haus sik.

Em i tok tu olsem strongpela sekyuriti bai i stap long geit long putim was olsem wanpela man o meri tasol bai i stap long haus sik olsem wasman o wasmeri long husat i sik na stap long haus sik.

Mista Waipma i tok strong olsem COVID-19 em i no giaman samting, na husat lain i tok em bai no inap bagarapim PNG i mas no ken mekim kain toktok olsem. COVID-19 em trupela sik na em i ken bagarapim sindaun na kisim laip bilong ol manmeri.

Em i tok olsem ol manmeri i mas go wantu tasol long haus sik sapos ol i kus planti, nek sigirap na ol i gat sik flu na dokta i ken sekim ol.

James G. Kila i raitim