COVID-19 Pandemik we i kamap long kantri na long wol i bin bringim planti bagarap na tu i bringim planti  gutpela samting tu.

Long dispela taim, ol nes sumatin na ol arapela sumatin bilong helt wok i tingting planti ken long disisen ol i mekim long wanem ol i laik lainim. COVID-19 Pandemik i nidim planti helt wokmanmeri long i go pas long daunim em.

Wanpela nes sumatin Steven Johnson husat i skul long Lae Skul bilong Nes em i wanpela bilong 10 sumatin husat i winim skolasip aninit long Australia Awod na Newscrest Patnasip program.

Steven i tok dispela pandemik i strongim em ken long mekim gut long skul wok bilong en bai em i ken inap long joinim wokfos na karimaut gutpela helt sevis long komyuniti.

“Ol ekspiriens na salens bilong COVID-19 i opim ai bilong mi long luksave long wanem samting bai kamap na olsem wanem bai mi rispon na bekim olsem nes long kain hevi long bihain taim,”em i tok.

Dispela pandemik i strongim em long tingting strong long sait bilong helt na karimaut awenes bilong COVID-19 long komyuniti em i stap long en.

Narapela wanskul bilong en Alice Jungai i no wet long pinisim skul pastaim na mekim wok. Nogat, nau yet wantaim hamas save em i kisim pinis em tu i mekim awenes long ol famili na ol pren bilong en.

“Mi luksave olsem bihain taim mi wok olsem nes bai mi stap long franlain na helpim ol sik manmeri, tasol nau yet mi ken statim wok long haus na komyuniti bilong mi,” em i tok.

Taim mi wok long lukim ol senis i kamap long dispela taim, dispela i strongim mi long mi mas mekim awenes long haus yet.

Rebecca Negere i raitim