Gavana bilong Oro Provins, Gary Juffa i tokaut olsem em i bai helpim Kokoda Memorial Distrik Haus Sik wantaim K250, 000 taim em i luksave olsem dispela haus sik i stap long mak nogut na i mas pas.

Gavana Juffa i mekim dispela toksave taim em i raun liklik long dispela haus sik las wik. Em i toktok wantaim ol komyuniti lida na ol sios lida taim ol i kam bung long haus sik long lukim em.  Ol i bin guria long lukim em tu bikos em i no bin toksave olsem em i bai go raun na lukim ol.

Na em i tokim ol olsem Kokoda Haus Sik em i namba wan samting em i laik lukluk na stretim na givim olgeta sapot we dispela haus sik bai nidim long stap gut na op yet na helpim ol pipel long Kokoda na Oro provins.

Gavana Juffa i bin stap long Kokoda taim em i liklik mangi na em i tok, Kokoda Haus Sik em i bikpela samting insait long histori bilong Oro olsem na gavman bilong en bai mekim dispela i kamap namba wan samting long lukluk long en.

Juffa i tokim edministresen bilong haus sik tu olsem em bai givim wanpela nupela ambulens wantaim ol medikol ikwipmen long apim helt sevis we dispela distrik haus sik i save givim.

Insait long dispela raun bilong Gavana Juffa, em i toktok wantaim Kokoda Taun Kaunsil, bung wantaim wokmanmeri bilong New Briten Palm Oil Limited (NBPOL), na ol lokal Bisnis Haus. Em i go raun tu na lukim Kokoda Praimeri na Laif Skil Senta na tu ol wok i kamap long ol rot long dispela eria.