OLGETA edukesen institusen long praimeri i go inap teseri i mas bihainim ol lo aninit long nupela nomol taim 2021 skul yia i stat, Kontrola bilong Nesenel Pandemik na Polis Komisina David Manning i tok.

Em i tok, pasin bilong wasim han na werim pes mask mas kamap insait long ol dispela institusen na ol institusen i mas kamapim ol ples bilong wasim han na putim ol samting bilong wasim han tu.

“Werim pes mask o karamapim pes bilong yu taim yu stap long pablik ples. Dispela em long lukautim yu na ol arapela long COVID-19. Klinim han bilong yu klostu klostu. Wasim wantaim sop na wara o yusim marasin wara long wasim han. Stap longwe olsem 1.5 mita long narapela. I no ken tasim maus, ai na nus bilong yu. Kus i go insait long han skru bilong yu na i no long han. Daunim o stopim pasin bilong raun long ol ples we ol manmeri i save pulap long en. Na klinim ol samting na ples we yu save tasim olgeta taim,” Kontrola Manning i tok.

Ol dispela em ol lo we i stap aninit long nupela nomol we Kontrola Manning i toktok long en. Long wankain taim, em i tok, namba bilong COVID-19 keis long kantri i sanap olsem 867 na 9-pela dai.

Rebecca Negere i raitim