OL skul i stat pinis dispela wik na planti tisa i no kamap yet long ol skul ol bai tis long en.

Papua Niugini Tisa Asosiesen (PNGTA) i askim olgeta Provinsal Edukesen Bod (PEB) long helpim ol tisa long i go bek hariap long skul bilong ol na redim ol yet pastaim long skul i stat.

PNGTA Nesenel Presiden Aita Sanangkepe i tok em i no rong bilong ol tisa sapos ol i go leit long skul. Em i asua bilong husat ol lain i no mekim wok bilong helpim ol i go bek hariap long ol skul bilong ol.

“Ol tisa i bin kisim pinis toksave long wanem skul bai ol i go tis long en,” Mista Sanangkepe i tok.

“Klostu bai ol skul i stat long 2021 na ol provins mas hariap long stretim trenspot bilong ol tisa na famili bilong ol long go kamap long skul bilong ol wan wan.”

PNGTA Jeneral Seketeri David Numbaming i sapotim tok bilong PNGTA presiden na i tok ol tisa long rurel eria I save hatwok tru long kamapim ol saveman na meri long kamap lida bilong kantri na helpim PNG long gro.

“Olsem na em i wok bilong PEB long ol i mas helpim kwik ol tisa na bringim ol i go skul bilong ol pastaim long skul kalenda i stat,” em i tok.

Joseph Dawai i raitim