IS Sepik Gavman i bai baim hap bilong skul fi bilong ol sumatin long Is Sepik. Ol sumatin long elamentri i go inap long sekenderi skul i bai kisim dispela helpim.

Mani mak bilong K6milen i bai go long dispela progrem olsem las yia. Namba bilong ol sumatin em 134,000 olgeta i bai kisim dispela helpim.

Ol sumatin long yunivesti na koles i bai mas toktok wantaim ol DDA o aplai long HELP program bilong Nesenel Gavman.

Is Sepik Provinsel Gavman i laik tokim ol papamama olsem  wok bilong stretim ol samting bilong skul i bai go yet na mipela i lukluk long stretim wanem samting i no kamap gut las yia. Bipo ol samting i no kamap gut i soim olsem ol i no bin lukautim ol mani na samting gut na mipela wok long mekim gut nau.

Ol skul bod i mas wok strong na mekim gut ol skul long sait bilong fand long go insait long skul.

Olgeta skul i bai salim ol proposel bilong ol i go insait lo gavman opis bilong stretim na mekim gut ol ples bilong ol sumatin long lainim samting. Mipela tu i  bai laikim ol i mas givim ripot long wanem samting ol i bin mekim wantaim ol mani ol i bin kisim pastaim long en.

Sapos ol skul i laik kisim projek fi long ol sumatin ol i mas kisim tok orait long Provinsel Edukesen Bod pastaim.

Ol papamama i mas save olsem lukautim pikinini na salim i go long skul em wok bilong ol na gavman wantaim. Ol i mas gat plen bilong salim ol pikinini i go long skul. Ol i mas no ken larim gavman tasol i mekim dispela wok.

Planti ol pikinini i no skul gut bilong wanem ol papamama i laikim ol tisa tasol i lainim ol na ol i no helpim ol pikinini long haus.

Planti ol samting ol pikinini i save lainim i save kamap long haus. Long dispela ol papamama i mas mekim wok bilong ol long lukautim ol pikinini na lainim ol gut.