KAM kisim bodi bilong ol famili bilong yupela long mog o ples bilong holim bodi bilong ol dai, na mekim gut long ol na planim ol, Dokta Kone Sobi, Dairekta bilong Medikol Sevis long Pot Mosbi Jeneral Haus Sik (POMGEN) i tok.

“Sapos yu save olsem famili o wanlain bilong yu i stap long mog, plis, yu kam kisim na mekim gut long en na planim em. Planti bodi i stap olsem 6-pela mun na 12-pela mun tu na ol famili i no kam kisim.

“Plis yu kam soim laikim na rispek na kisim ol i go,” Dokta Sobi i tok.

Em i mekim dispela toktok bikos mog em i liklik na i nogat inap spes na wokman long lukautim na holim bikpela namba bilong bodi bilong dai manmeri longpela taim.

Em i mekim dispela singaut i go long ol pipel husat i stap long Nesenel Kepital Distrik, Sentral Provins na Galp long i go kisim bodi bilong ol famili na wanlain bilong ol husat i dai na i stap long mog longpela taim.

Planti bodi bilong ol dai man i stap yet long mog long POMGEN na ol famili bilong ol i no go kisim.

Albert Tole, man husat i go pas long lukautim mog long POMGEN na husat i wok wantaim POMGEN moa long 21 krismas i tok 45 indai manmeri long long mun Ogas na Septemba las yia i stap yet long mog.

“ Dispela 45 bodi bilong ol dai manmeri long las yia Ogas na Septemba i stap yet na mipela i no kaunim yet ol bodi bilong dai man long mun Oktoba , Novemba na Disemba. Mipela bai kaunim na toksave,” Mista Tole i tok.

Dokta Kone Sobi i tok dispela mog inap long holim 90 bodi bilong dai manmeri tasol nau yet em i holim moa long 200 dai manmeri.

Em i tok ol fesiliti o sila bilong lukautim ol dai man i no inap long holim namba bilong ol dai manmeri i stap pinis olsem na ol i dabolim tupela o tripela bodi long wanpela trei.

“I gat tupela sila i stap insait long bilding bilong mog na i ken holim 60 dai manmeri, tasol long nau yet wanpela tasol i wok na narapela i bagarap sampela mun i go pinis. Mipela i kisim ol kontrakta long stretim tasol em i bagarap yet bikos em i go olpela pinis,” Dokta Sobi i tok.

 Em i tok sampela yia i go pinis ol sampela gutpela patna bilong POMGEN i luksave long nid bilong ol na i bin givim tripela kontena long putim ol dai manmeri.

“Wan wan bilong ol dispela tripela kontena i ken holim 20-pela bodi bilong dai manmeri,” Dokta Sobi i tok.

Em i tok, tasol dispela tu em i no inap long namba bilong ol dai i wok long kamap long wan wan de long POMGEN na tu ol sikspela wokman tasol i save wok insait long dispela mog.

Rebecca Negere i raitim