AUSTRALIA i laik sapotim sekyuriti bilong helt na bringim bek ikonomi bilong Papua Niugini.

Long mun Oktoba las yia, Australia i bin tokaut long K1.3 bilien plen bilong Regional COVID-19 Vaccine Access na Health Security long sapotim ol gavman long Pasifik na Saut Is Esia long kisim sut marasin bilong COVID-19 na helpim ol pipel.

Insait long dispela plen, Australia bai givim K374 milien long baim sut marasin bilong COVID-19 bilong tripela yia. Dispela em narapela helpim gen i kam long PNG antap long ol arapela developmen helpim Australia i save givim long kantri.

Hai Komisina bilong Australia long PNG, Jon Philp i tok Australia i amamas long sapotim PNG long karimaut sut marasin long givim sans long olgeta manmeri na pikinini long PNG long banisim bodi bilong ol long COVID-19.

“I gat gutpela bilong sut marasin bilong helpim mipela olgeta long abrusim ol bagarap COVID-19 i bringim. Long kisim bek gutpela helt na gutpela ikonomi we dispela pandemik i bagarapim, i mas i gat bikpela mak bilong ol manmeri na pikinini i kisim banis sut bilong COVID-19,” Jon Philp i tok.

Rot bilong kamapim gen gutpela raun, turisim na tred em sut marasin bilong COVID-19. Dispela bai helpim ol planti pren na famili long bung gen na ol sans bilong i go trening long ovasis, wok, pilai na senisim kalsa i ken kamap gen.

Aninit long dispela plen, Australia bai helpim PNG long baim ol sut marasin bilong COVID-19 i stap long intenesenel mak. Ol i bai givim ol teknikel sapot long kantri long dispela tingting tu.