TUPELA gavman Minista husat i lukautim wok bilong eduksen long PNG i bin bungim pes long Madang long las wik Fraide, na i bin amamas wantaim long tokaut long ol sampela nupela plen bilong gavman long strongim edukesen sistem long kantri.

Minista bilong Eduksen, Jimmy Uguro wantaim Minista bilong Haia Edukesen, Sains, Risets na Teknoloji, Wesley Raminai i bin bung antap long balus na taim Uguro i luksave olsem MP bilong Kagua-Erave long go  long Madang em i amamas long welkamim em  i go long haus bilong em long brekfas kaikai.

Mista Raminai i bin go long Madang long stap lukim kaunsil miting bilong Westen Pasifik Yunivesiti. Dispela em nupela yunivesiti we i stap long Ialibu long Sauten Hailans provins.

Em i bin go wantaim Seketeri bilong Haia Edukesen Risets, Sains naTeknoloji, Pater Jan Czuba na ol arapela yunivesiti kaunsil memba.

Long wanpela miting bilong tupela minista wantaim ol lida bilong Usino-Bundi na Madang, tupela minista i serim tingting bilong tupela long wok bung wantaim long lukim olsem eduksen sistem long kantri i wok orait long sevim ol pipel na ol institusen olsem skul, kolis, teknikol skul na yunivesiti.

MistaUguro i tokaut olsem bikpela wok nau i stap long sampela eria we ol seksen bilong edukesen dipatmen long pastaim i stap wanpela tasol, na ol sampela wok nau i mas go long Haia Edukesen, Risets, Sains naTeknoloji dipatmen.

Tasol Mista Uguro i tokaut olsem em wantaim Minista Raminai bai wok bung wantaim na serim tingting long lukim olsem ol wok na sistem we i karamapim tupela minista i ran orait tasol.

Raminai i bin mekim sampela bikpela toktok long helpim bilong gavman i go long ol teseri institusen olsem kolis na yunivesiti long kantri.

Minista Raminai i tokaut olsem  TESAS program bilong gavman bai go het yet.

Narapela bikpela toktok Mista Raminai i bin tokaut long en em HELP program bilong Marape gavman.

HELP program bilong Haia Edukesen Dinau Program. Dispela program Marape gavman i  bin bringim i kamap long dispela yia bai lukim olsem ol sumatin husat i stap long ol bikpela kolis na yunivesti i ken kisim dinau long gavman long baim skul fi bilong ol. Bihain ol i ken bekim i go insait  long sampela yia.

“Dispela program i kamap long stopim ol papamama long no ken go kisim dinau mani na em i helpim ol pikinini long luksave olsem ol i mas skul strong na bekim dinau na wok strong long kisim gutpela save,” Raminai i tok.

Em i tok dispela sistem bai strong liklik bikos olgeta sumatin husat i laik kisim helpim aninit long HELP i mas gat NID (nesenel aidentifikesen kad) na ol i mas gat gret 12 setifiket na tu skul ripot na mak bilong ol i soim long pepa.

Mista Raminai i tok dispela em wanpela gutpela sistem we gavman i kamapim long helpim ol sumatin i stap long bikpela kolis na yunivesiti long baim skul fi bilongol i go inap 20 yia bihain.

“Ol sumatin husat i kisim skul fi helpim i ken baim liklik olsem K20 na dispela i ken go olsem 20 yia,”:Raminai i tok.

Em i tok nogat planti kantri long wol i save yusim dispela kain sistem. Tasol ol liklik lain husat i yusim dispela sistem i luksave olsem em i helpim ol gut na i kamapim gutpela human risos long kantri long bihain taim.

James G. Kila i raitim