GAVMAN bilong Morobe i givim mani long sapotim Evanjelikal Luteren Sios Nesenel Wimen Konprens na Kabwum Hai Skul.

 Dispela em hap wok bilong Morobe Provinsal Gavman long luksave na strongim wok bilong Gavman Sios Patnasip Program long Morobe Provins.

Gavana bilong Morobe Provins Ginson Goheyuc Saonu i bin givim K500,000 bilong wokim nupela bikpela haus bung we i ken bungim olgeta kongrigesen bilong olgeta ELC-PNG Nesenel Wimen Konprens. Kabwum Haiskul bai go pas long holim dispela bung long Septemba long dispela yia.

Dispela mani sapot bai helpim long sanapim bikpela ples kibung we bihain ol sumatin i ken yusim long sindaun na mekim skul wok bilong ol.

Long wankain taim, Gavana Saonu i bin givim sek mani long Kabwum Haiskul atoroti bilong ELC-PNG ekseketiv long Ampo Hetkwata long Sarere. Gavana Saonu i tok dispela em wok bilong em long lukim na yusim ol pablik mani gut long lukautim planti pipel long wanpela taim. 

“Dispela mani bai go long sapotim dispela wok bilong ol sios na tu skul i ken yusim long mekim skul wok long en. Dispela em rait rot we gavman i bin kisim na sapotim.”

 “ Liklik mani bilong ol pipel mi givim em bilong helpim bikpela wok bilong ol pipel, i no bilong Utaka circuit o Kabwum tasol, em i bilong planti manmeri. Dispela mani tu bai helpim wok bilong sios, edukesen, na sapotim ol sumatin tu long skul.”

Gavana Saonu i tok dispela mani bai helpim long promotim sios, edukesen, provins na lidasip na lukim dispela sapot bai gro bikpela insait long Kabwum distrik.

Gavana Saonu i tok gavman bilong em i amamas long painim moa ples long go insait long sapotim long dispela taim bilong gavman.

Em i tok dispela em bikepla samting long sapotim ol wok bilong meri insait long provins bikos ol meri em menesa bilong haus na famili wantaim.